Тохсунньу – Таҥха ыйа. Былыр-былыргыттан биһиги өбүгэлэрбит таҥха иһиллээн, сэрэбиэй быраҕан, кистэлэҥ эйгэ быыһын сэгэтэн, инникилэрин тымтыктанан көрөллөрө. Бүгүн 4 кылаас үөрэнээччилэригэр "Таайтарыылаах Таҥха" тэрээһин ыытылынна. Манна оҕолор Таҥха өйдөбүлүн, билгэлээһин туһунан бэсиэдэ иһиттилэр, кинигэлэри кытта билистилэр. Салгыы Таҥха оонньууларын оонньоотулар, бу сылга баҕа санааларын суруйан хааллардылар. Түмүгэр тэрээһинтэн тугу билбиттэрин тургутан көрөр боппуруостарга эппиэттээтилэр.
Бүгүн, ахсынньы 23 күнүгэр, Саха Өрөспүүбүлүкэтин норуотун хаһаайыстыбатын үтүөлээх үлэһитэ, Уус Алдан улууһун уонна Курбуһах нэһилиэгин Бочуоттаах олохтооҕо Петр Николаевич Аммосов олоҕун, үлэтин кэпсиир кинигэ сүрэхтэниитэ буолан ааста.
Кинигэни кыыһа Черноградская Татьяна Петровна хомуйан оҥордо. Кинигэҕэ Петр Николаевич бэйэтэ суруйбут араас кэмнээҕи ахтыылара, эҕэрдэлэрэ, очеркалара, чугас аймахтарын, билэр дьоннорун ахтыылара киирдилэр. 245 страницалаах халыҥ тастаах кинигэ Офсет типографияҕа 50 экземплярынан бэчээттэнэн таҕыста. Кинигэ хас да түһүмэхтээх, элбэх хаартыскалардаах, 1 Курбуһах нэһилиэгин Окоемовтарын төрүччүтэ кинигэ ис хоһоонун байытар.
Тэрээһиҥҥэ Коммунистическай партия Уус Алданнааҕы райкомун I секретара Оллонов Г. Н., II секретара Тордуянова В. С., биир идэлээхтэрэ, киэҥ өрүттээх общественнай үлэтигэр алтыһан ааспыт доҕотторо, уруу-аймах дьоно, дьиэ кэргэнэ түмсэн, истиҥ ахтыылары оҥордулар, саҥа кинигэ күн сирин көрбүт үөрүүтүн үллэһиннилэр.
Ахсынньы 9 күнүгэр Аҕа дойду Геройдарын күнэ бэлиэтэнэр. Бу күн хорсун быһыыларын иһин Ийэ дойду үрдүкү государственнай наҕараадатыгар – Советскай Союз Геройун, Россия Федерациятын Геройун, Албан аат уонна Сибэтиэй Георгий орденнарынан наҕараадаламмыттары чиэстииллэр. Бүгүн Курбуһах орто оскуолатын үөрэнээччилэригэр бу күҥҥэ аналлаах история чааһа ыытылынна. Манна оҕолор Уус Алдан улууһун Геройдарын, чуолаан биир дойдулаахпын Николай Дмитриевич Бурнашев олоҕун уонна үлэтин туһунан билистилэр.
