Оҕо-аймах кутун туппут поэтесса, суруйааччы Агния Барто бүгүн, олунньу 17 күнүгэр, төрөөбүтэ 120 сылын туолла. Бу бэлиэ күҥҥэ "Чуораанчык" уһуйаан кырачааннарыгар "Үтүө санаа поэзията" тэрээһин ыытылынна.

Оҕолор суруйааччы олоҕун, айар үлэтин билистилэр, хоһооннорун дорҕоонноохтук аахтылар. "Оонньуурдар" хоһооннорун сахалыы тылбаастарын иһиттилэр, хартыыналары кырааскалаан кинигэ оҥордулар.

Кырачааннар Агния Барто үтүөҕэ үөрэтэр хоһооннорун үөрэтэн, ааҕан  үчүгэйи-куһаҕаны араара үөрэниэхтэрэ диэн эрэнэбит.

“Чуораанчык” уһуйааҥҥа Төрөөбүт тыл, сурук-бичик күнүн оҕолор, иитээччилэр, үлэһиттэр түмсэн, сахалыы сайа саҥаран өрө көтөҕүллэн көрүстүбүт. “Сахам тыла барахсан” тэрээһин Саха Өрөспүүбүлүкэтин Өрөгөй ырыатыттан, “Ийэ тылым” хоһоону күргүөмүнэн ааҕыыттан саҕаланна.

Библиотекарь Пестрякова М.А. бу күн суолтатын туһунан кэпсээтэ, Багдарыын Сүлбэ “Аатта тал” кинигэтиттэн сахалыы ааттарын оҕолорго быһааран биэрдэ. Уһуйаан эдэр үлэһитэ Прядезникова В.В. “Оһуор” үҥкүү хамсаныыларынан флешмоб ыытта, үҥкүүгэ оҕолор үөрэ-көтө көхтөөхтүк кытыннылар.

Салгыы иитээччи Курилкина М.В. сахалыы астары төһө билэллэрин ойууларынан тургутук оҥордо, манна саамай элбэҕи Иванов Миша таайда. Маны таһынан Марина Васильевна оҕолорго сахалыы остуол оонньууларын тэрийэн ыытта. Тэрээһин уопсай оһуохайынан түмүктэннэ, оһуохайы иитиллээччилэр Винокурова Уйгулаана уонна Никифорова Полина таһаардылар. 

Төрөөбүт тыл уонна сурук-бичик күнүгэр аналлаах быйыл 12-с төгүлүн ыытыллар “Cахалыы дьыктаан" өрөспүүбүлүкэтээҕи акцияҕа Курбуһахтааҕы кырдьаҕастар уонна инбэлииттэр дьиэлэрин олохтоохторо көхтөөхтүк кыттыстылар. Дьыктааны Уус Күөлүнээҕи модельнай библиотека үлэһитэ Пестрякова М.А. суруйтарда.

Кырдьаҕастар бары дьыктааны олус үчүгэйдик суруйдулар, биир да алҕаһы оҥорботох Петров Николай Николаевич "Бастыҥ суруксут" анал аатынан бэлиэтэннэ. Дьыктааны бэрэбиэркэлиир кэмҥэ Винокурова Е.Н. сахалыы түргэнник ааҕыы күрэҕин тэрийэн ыытта. Манна мүнүүтэҕэ саамай элбэх тылы ааҕан Попов Павел Николаевич кыайыылааҕынан таҕыста. Кырдьаҕастарбыт бу тэрээһиҥҥэ кыттан сэргэхсийдилэр, сүргэлэрэ көтөҕүлүннэ, өссө да дьыктаан суруйуутугар кыттыахпыт диэтилэр.

Нэһилиэк историятын үөрэтии дьиэ-кэргэн историятын үөрэтииттэн саҕаланар. Төрөөбүт тыл, сурук-бичик күнүн көрсө Курбуһах оскуолатын үрдүкү кылаастарын үөрэнээччилэригэр төрүччүнү оҥорууга дьарык ыытылынна. Манна оҕолор дьиэ кэргэн төрүччүтүн оҥорууну хайдах саҕалыырга сүбэлэри ыллылар, кинигэлэргэ киирбит нэһилиэкпит төрүччүлэрин   кытта билистилэр. Национальнай архыып, Национальнай библиотека сайтарыгар бэйэҥ төрүччүгэр сөптөөх докумуону хайдах көрдүүргэ үөрэннилэр, Дмитрий Киркинскай “Древо жизни” төрүччүнү оҥоруу электроннай программатын ис хоһоонун, тутулун кытта  билистилэр. Аныгыскы дьарыкка оҕолор “Древо жизни” программаҕа хайдах үлэлииргэ үөрэниэхтэрэ, дьиэ-кэргэннэрин төрүччүлэрин программаҕа киллэрэргэ холонуохтара.