ВАСИЛЬЕВ ГАВРИЛ ГАВРИЛЬЕВИЧ
1949 сыллаахха Уус Алдан оройуонун Курбуһах нэһилиэгэр төрөөбүтэ. Курбуһах орто оскуолатын бүтэрэн баран производствоҕа 2 cыл үлэлээбитэ. Ленинград куоракка тутуу идэтин биэрэр ГПТУну кыһыл дипломунан, Амурскайдааҕы тутуу техникумун ситиһиилээхтик үөрэнэн бүтэрбитэ. 1974 c. “Ленинградский университет рабочих корреспондентов” диэн киэһээҥҥи үөрэҕи бүтэрэн “Верхоянский коммунист” хаһыакка үлэлээбитэ. Дойдутугар Курбуһахха кэлэн өр кэмҥэ биригэдьииринэн, кырдьаҕастар интернат дьиэлэригэр директорынан үлэлээбитэ.
“Гражданскай килбиэн”, “Саха Республикатын тутуутун бочуоттаах ветерана”, “Уус Алдан улууһун социальнай-экономическай сайдыытыгар кылаатын иһин” бэлиэлэр хаһаайыннара. 4 оҕолоох, 9 сиэннээх.
ВАСИЛЬЕВА ПЕЛАГЕЯ ЕГОРОВНА-УШНИЦКАЯ ГЕЯ
Уус Алдан оройуонун Курбуһах нэһилиэгэр 1964 сыллаахха төрөөбүтэ. Курбуһахха “Сардаҥа” сопхуоска ыанньыксытынан, Уус Күөлүн уһуйааныгар иитээччи көмөлөһөөччүтүнэн үлэлээбитэ. 3 уол оҕолоох, 8 сиэннээх. Пелагея Егоровна кыра саастаах оҕолорго анаан хоһооннору суруйар. 2018 сыллаахха убайа Виктор Ушницкай “Ньургуһуннуун көрсүһүү” хоһоонугар мелодия айбыта, ол ырыата “Уус Алдан мелодистара” кинигэҕэ киирбитэ.
ВАСИЛЬЕВА ТАТЬЯНА АФАНАСЬЕВНА
(1947-2019)
1947 сыллаахха Уус Алдан оройуонугар Дүпсүн нэһилиэгэр төрөөбүтэ. Олоҕун аргыһын Васильев В. Р. көрсөн, кэргэн тахсан Курбуһахха олохсуйбута. Уус Күөлгэ спортзалга уборщицанан, балыыһаҕа санитарканан үлэлээн пенсияҕа тахсыбыта. Улахан дьиэ кэргэн ийэтэ, эбэтэ, хос эбэтэ этэ.
Васильева Т. А. улууска күүстээх саахымаччытынан, дуобаччытынан биллэрэ. Кини туйаҕын хатаран билигин Татьяна Афанасьевна оҕолоро, сиэннэрэ бу остуол оонньууларыгар үрдүк ситиһиилэннилэр.
Татьяна Афанасьевна Уус Күөлүн библиотекатын иһинэн тэриллибит “Куду” литературнай түмсүү көхтөөх чилиэнэ этэ. Нэһилиэк, улуус иһинэн ыытыллар литературнай конкурстарга кыттан миэстэлэһэрэ.
ВЕРЕВКИН РУДОЛЬФ ИВАНОВИЧ
Бүлүү оройуонугар Чочу нэһилиэгэр 1946 сыллаахха төрөөбүтэ. Бүлүү педагогическай училишетыгар, Саха государственнай университетыгар үөрэнэн история учуутала идэлээх. Уус Алдан, Амма, Бүлүү, Нам оскуолаларыгар өр кэмҥэ учууталынан үлэлээбитэ. Саха Республикатын үөрэҕириитин бочуоттаах бэтэрээнэ. Хабылыкка, хаамыскаҕа өрөспүүбүлүкэ хас да төгүллээх кыайыылааҕа, бу көрүҥнэргэ өрөспүүбүлүкэ күрэхтэһиилэригэр судьуйалыыр. “Оһуохай” уопсастыба чилиэнэ, Саха Өрөспүүбүлүкэтин үтүөлээх этээччитэ.
Рудольф Иванович тэттик кэпсээннэрэ “Ленинскэй тэрийээччи”, “Туймаада”, “Кыым” хаһыаттарга, “Кыраһа суруга”, “Күрүлгэн” сурунаалларга бэчээттэммиттэрэ.
ВИНОКУРОВА АННА МИХАЙЛОВНА
Верхоянскай оройуонугар Хайыһардаах бөһүөлэгэр 1947 сыллаахха төрөөбүтэ. Дьокуускайдааҕы культурнай-сырдатар училищены үөрэнэн бүтэрбитэ. Винокуров И. Ф. кэргэн тахсан, биэс оҕолонон, элбэх сиэн эйэҕэс эбэтэ буолан, билигин кэргэнин дойдутун иккис дойду оҥостон Курбуһахха олорор.
Анна Михайловна анал медицинскэй үөрэҕэ суох да буоллар, олохтоох балыыһаҕа дьуһуурунай сиэстэрэнэн бочуоттаах сынньалаҥҥа тахсыар диэри өр кэмҥэ үлэлээбитэ.
Анна Михайловна хоһоонноро, кэпсээннэрэ, ыстатыйалара өрөспүүбүлүкэ хаһыаттарыгар бэчээттэнэллэр, 2020 с. “Аныыбын бар дьоҥҥо” хоһооннорун хомуурунньуга бэчээттэнэн тахсыбыта. Улууска ыытыллар уус-уран күрэхтэргэ, викториналарга көхтөөхтүк кыттар, бириистээх миэстэлэргэ тиксэр. “Мүрү саһарҕата” хаһыат общественнай корреспондена - Курбуһах сонуннарын тиһигин быспакка сырдатар, нэһилиэк дьонун-сэргэтин үйэтитиигэ үлэлэһэр. Анна Михайловна “Куду”, “Төлөн” ветераннар түмсүүлэрин көхтөөх чилиэнэ, хаамыскаҕа, хабылыкка Уус Алдан улууһун чемпиона, призера.
ВИНОКУРОВА МАРИЯ ИВАНОВНА
1969 сыллаахха Уус Алдан улууһун Сыырдаах бөһүөлэгэр күн сирин көрбүтэ. Амурскайдааҕы культурнай-сырдатар училищены бүтэрбитэ. Билигин Курбуһахтааҕы кырдьаҕастар дьиэлэригэр культурнай-маассабай тэрийээччинэн үлэлиир.
Саха Өрөспүүбүлүкэтин социальнай сулууспатын туйгуна, өрөспүүбүлүкэ социальнай тэрилтэлэрин икки ардыларыгар ыытыллыбыт күрэххэ “Айымньылаах үлэтин иһин” анал аат кыайыылааҕа. “Мүрү саһарҕата” хаһыат общественнай корреспондена. Кэпсээнэ “Мин маҥнайгы тапталым” хомуурунньукка бэчээттэммитэ. “Социокультурная реабилитация пожилых и инвалидов” методическай көмө брошюра, “Үйэ чиэппэрэ социальнай эйгэҕэ”, “Тыыннаах хаартыскалаах” альбом автора.
ГРИГОРЬЕВА ЕЛИЗАВЕТА МИХАЙЛОВНА
(1965-2020)
1964 сыллаахха Уус Алдан орйуонугар Курбуһах нэһилиэгэр төрөөбүтэ. Орто анал үөрэхтээх. 3 уол оҕо ийэтэ, 2 сиэн эбэтэ. Өр кэмҥэ "Сардаҥа" инбэлииттэр түмсүүлэрин бэрэссэдээтэлинэн үлэлээбитэ. Нэһилиэк, улуус уопсастыбаннай олоҕор көхтөөхтүк кыттара. Олус үчүгэйдик баайара, иистэнэрэ. Елизавета Михайловна күннээҕи дьиэ-уот түбүгүттэн быыс булан хоһоон хомоҕой тылларынан санаатын кэпсиир үтүө дьарыктааҕа. Айылҕа кэрэ көстүүлэрин, таптал, олох туһунан хоһоонноро чахчы ис сүрэхтэн тахсар иэйиилээх тылларынан суруллубуттар. “Куду” литературнай түмсүү көхтөөх чилиэнэ этэ. Хоһоонноро “Мүрү саһарҕата” хаһыакка бэчээттэммиттэрэ, араас литературнай конкурстарга кыттыбыта.
ЕРМОЛАЕВА АГАФЬЯ ЛАВРЕНТЬЕВНА
1954 сыллаахха Уус Алдан оройуонугар Окоемовка бөһүөлэгэр төрөөбүтэ. Воспитатель идэлээх. Уус Күөлүн “Чуораанчык” уһуйааныгар иитээччинэн 1976 сыллаахтан бочуоттаах сынньалаҥҥа тахсыан диэри үлэлээбитэ. Педагогическай үлэ ветерана.
Агафья Лаврентьевна “Куду” литературнай түмсүү чилиэнэ, детсакка үлэлиир кэмигэр оҕоҕо аналлаах тэттик хоһооннору суруйан үлэтигэр туттара, хомоҕой тылынан истиҥ иэйиилээхтик айылҕа, олох туһунан хоһооннору суруйар. Кини нэһилиэк уус-уран самодеятельноһыгар, ветераннар түмсүүлэригэр көхтөөхтүк кыттар. Билигин Агафья Лаврентьевна сиэннэрин бүөбэйдэһэр.
МЕСТНИКОВ ИВАН ИВАНОВИЧ
(1942-2013)
1942 сыллаахха Уус Алдан оройуонун I Курбуһах нэһилиэгэр төрөөбүтэ. 25 сыл суоппарынан үлэлээбитэ. Кэргэнинээн Местникова К. Н. нэһилиэк, улуус уопсастыбаннай олоҕор, уус-уран самодеятельноһыгар көхтөөхтүк кытталлара. 4 оҕону атаҕар туруоран, дьоллоох эһээ, эбээ буолбуттара.
Иван Иванович “Куду” түмсүү тэриллиэҕиттэн көхтөөх чилиэнэ этэ. “Олоххо олук уурсан” хоһооннорун хомуурунньуга 2005 сыллаахха бэчээттэнэн тахсыбыта. Аҕа дойду сэриитин кыттыылааҕа, ат баайааччы Аммосов В. А. анаан суруйбут “Фронтовик кэпсээнэ” поэмата “Мэлдьи инники күөҥҥэ” (2005), “Дьөһөгөй оҕотунуун алтыһан” (2018) кинигэлэргэ бэчээттэммиттэрэ. Местников И. И. “Кырдьаҕастар ыллыыбыт”, “Өрүү бииргэ ыллыахха” хоһоонноругар Павел Акимов мелодия суруйан күн бүгүн ыллана сылдьаллар.
Подкатегории
Страница 1 из 2
