Убайым, Наум Егорович Ермолаев, Уус-Алдан оройуонун иккис Курбуһах нэһилиэгин Балаҕаннаах учаастагыттан үүнэн, ситэн-хотон тахсыбыт үтүөкэннээх ыччаппыт, элбэҕи эрэннэрэр, кыайыыларын кэтэһэр тустуукпут этэ.

     Балбаара, Дьөгүөр Ермолаевтар икки уоллара спорт көрүӊүттэн көӊүл тустууну талбыттара. Улахан уол Дьөгүөр зоотехник идэтин баһылаан, кэлин Суоттуга тыа хаһаайыстыбатыгар, эти – үүтү элбэтэргэ,эӊкилэ суох ситиһиилээхтик үлэлээбитэ.Оттон аччыгый уол, Наум, оскуола сааһыттан тустуу эйгэтигэр киирбитэ. Оччолорго Курбуһах интэринээт-оскуолатыгар физкультура уонна даҕаны атын предмет учууталлара: Егор Егорович Аммосов, Афанасий Нестерович Максимов уонна Гаврил Васильевич Бурнашев көҕүлээһиннэринэн тустуу, сүүрүү, хайыһар, мээчик оонньуутун секцията тиһигин быспакка үлэлиирэ. Оччотооҕу оскуола оҕото, бөһүөлэк эдэр ыччата бары олус көхтөөхтүк дьарыктаналлара, араастаһымнаах күрэхтэһиигэ күргүөмүнэн кытталлара.

    Көҥүл тустууга ССРС спордун маастара (1972), Уһук Илин уонна Сибиир оҕолорго аһаҕас турнирын чемпиона (1964), ССРС Сэбилэниилээх күүстэрин күрэхтэһиитин призера (1968), Уһук Илин уонна Сибиир первенствотын чемпиона (1968), призера (1969, 1972), Бүтүн Сойуустааҕы аһаҕас турнир чемпиона (1969), профсоюзтар Бүтүн Сойуустааҕы күрэхтэһиилэрин призера (1970, 1971), А.Иваницкай бирииһигэр Бүтүн Сойуустааҕы турнир призера (1971), РСФСР турнирын призера (1971), Н.Н.Тарскай бирииһигэр ыытыллар турнир призера (1971, 1973, 1975), Бүтүн Сойуустаҕы “Урожай” уопсастыба биэс төгүллээх чемпиона.

   Улууспут уһук муннуга Курбуһах нэһилиэгэ кус быһый, ат бөҕө, ылбаҕай ырыаһыт, талааннаах тарбахтаах дьоннорунан былыргыттан сураҕырар. Омук эрэ сөбүлээн, умсугуйан дьарыктанар спорт уустук көрүҥүн тустууну пропагандалааччыларынан Курбуһахтар буолаллар.

     Бу үрүлүйэр үрэхтэрдээх, ымыылаан ыллаһар хатыҥнардаах, "кэпсээ" диэбит курдук кэккэлэһэн кэбиспит тэҥкэ тииттэрдээх, куобах үөскүүр куруҥ тыалардаах үтүө-мааны сиртэн улуус эрэ аатын буолбакка, Саха сирин ааттатар үгүс тустуук үөскээн-төрөөн тахсыбыттарын үүнэр көлүөнэҕэ өйдөтөн ааһарбыт наадалаах. Кинилэртэн биирдэстэрэ көҥүл тустууга ССРС спордун маастара Наум Егорович Ермолаев биир көлүөнэ тустууктарын кэпсээниттэн кини кылгас эрээри чаҕылхай спортивнай олоҕу олорбутун билиҥҥи көлүөнэ истэн, ымсыыра, сөҕө саныыллар.