Саха Республикатын Ил Дархана Айсен Николаев 2023 сыл балаҕан ыйын 7 күнүнээҕи Ыйааҕынан ыам ыйын 25 күнүн Оһуохай күнүнэн биллэрбитэ. Оһуохай күнэ быйыл бастакытын бэлиэтэнэр. Ыйаах саха төрүт үҥкүүтүн - Оһуохайы - харыстыыр уонна тарҕатар соруктаах. Бу күн туһунан манна киирэн көрүҥ ОҺУОХАЙ. Ону тэҥэ оһуохай туһунан төһө билэргитин бэрэбиэркэлэниҥ  ТУРГУТУК . 

     Бу орто туруу бараан дойдуга ыал буолан олоруу, оҕо төрөтүү – үрдүк дьол, олоххо ситиһии. Дойду Президенэ Владимир Путин бу сылы Дьиэ кэргэн сылынан биллэрбитэ   мээнэҕэ буолбатах. Дьиэ кэргэн уопсастыба тутаах оҥкула буолар.  Элбэх оҕону иитии, үөрэттэрии, атахтарыгар туруоруу улахан сыраттан кэлэр. Күн бүгүн Курбуһах нэһилиэгэр үйэ аҥарын устата бииргэ олорон, кыһыл көмүс сыбаайбаларын бэлиэтээбит Ирина, Василий Курилкиннар, Елизавета, Рудольф Веревкиннар, Татьяна, Иван Пестряковтар, Варвара, Владимир Стручковтар, Анна, Иван Ермолаевтар уонна бриллиантовай сыбаайбаларын бэлиэтээбит ытыктабыллаах кырдьаҕастарбыт Клара, Коммунар Аммосовтар уонна Розалия, Василий Дегтяревтар оҕолорун, сиэннэрин, хос сиэннэрин тапталларыгар угуттанан быр-бааччы олороллор, эдэр ыччакка холобур буолаллар. Күндү дьоммутугар кытаанах доруобуйаны, эйэлээх халлааны, нус-хас олоҕу баҕарабыт! 

ДЬИЭ КЭРГЭН КҮНҮНЭН!

Ыалга оҕо төрүүрэ -
Түүҥҥү таптал бэлэҕэ,
Үтүө киһини үүннэрии -
Үгүс түбүк түмүгэ.

Ийэ буолуу - бу ыарыы!
Ийэ буолуу - бу тулуур!
Сууйуу-сотуу, аһатыы
Бүппэт түбүк күннэтэ.

Аҕа киһи дьиэ дьонун
Эрэллээхэй эркинэ:
Булуу-талыы, хааччыйыы
Кыһалҕаны чэпчэтии.

Ийэ-аҕа биир тэҥник
Сүбэлэрин холбооннор
Сиэрдээх суолга оҕону
Иитэллэрэ - дьол төрдө!

Иллээх-дьоллоох дьиэ кэргэн -
Бүтүн дойду туруга!
Дьоһун олох олоруу -
Олох дьолун амсайыы!

Күннээх халлаан киһитэ
Дьиэ кэргэҥҥин Эн тэрин!
Кэлбит иэскин толорон
Кэнчээригин эн хааллар!

                               Полина Победа

 Саха чаҕылхай лирик поэттарыттан биирдэстэрэ Г.Г.Вешников – Баал Хабырыыс айылҕаны хоһуйбут айымньылара талааннаах художник ойуулаабыт хартыынатыгар тэҥнээхтэр. Кини этэрэ: «Мин оҕо эрдэхтэн испэр иҥэрбит, сүрэхпэр хатаабыт айылҕабын олус таптыыбын. Кинитэ суох сатаммаппын». Бу түгэн туох ханнык иннинэ Баал Хабырыыс тыа сириттэн быстыспат ситимнээҕин, дьиҥнээх саха киһитэ буоларын көрдөрөр. Кини Саха сирин айылҕатын уратытык көрбүт, туойбут, онон Ийэ дойдуга бэриниилээх буолуу тыыныгар иитиигэ биллэр кылааты киллэрбит поэт буолар.

  Баал Хабырыыска аналлаах нэдиэлэ чэрчитинэн "Ыстарбын ньии дьон сүрэҕэр туох эрэ кэрэни айан" литературнай киэһэ Н.Н.Окоемов аатынан Курбуһах орто оскуолатыгар буолан ааста. Поэт бэйэтин хоһоонноругар төрөөбүт Сахатын сирин чысхаан кыһынын, саргылаах сааһын, самаан сайынын, өксүөннээх күһүнүн хоһуйбут айымньыларынан литературнай киэһэни оскуола учууталлара тэрийэн ыыттылар. Бу күн айылҕа түөрт кэмин дьүһүйэр элбэх хоһоон ааҕылынна, ырыа ылланна. Бу ураты киэһэни бэлэхтээбит "Квант", "Диалог", "Сайдыс", "Родник" методическай холбоһуктарга махталбытын тиэрдэбит. Поэзия нарын долгунугар бииргэ олорсон бу киэһэттэн бары астынан, сүргэбит көтөҕүллэн, хоһоон түһүлгэтигэр кыттан үөрэн – көтөн тарҕастыбыт. 

  Курбуһах нэһилиэгин уһуйааннарын икки ардыларыгар үгэс быһыытынан саас аайы ыытыллар  Баал Хабырыыс хоһооннорун ааҕыыга "Күн бытархайа" диэн күрэскэ быйыл дьиэ кэргэнинэн ааҕыы ыытыллыбыта олус сэргэх буолла. Бары кыттааччыларбытыгар улахан махталбытын тиэрдэбит уонна бу курдук биир дойдулаахпыт хоһооннорун куруутун ааҕа, оҕолоргутугар тапталы иҥэрэ туруоххут диэн эрэнэбит.

   Ааҕыылары манна киирэн көрүҥ, сэргээҥ "КҮН БЫТАРХАЙА" 

Кыайыылаахтар