Муус устар 2 күнүгэр "Сээркээн сэһэнньит Сөдүөт Омуоһап" диэн кинигэни билиһиннэрии буолан ааста.

Кинигэҕэ Курбуһах нэһилиэгин ытыктанар кырдьаҕаһа Аммосов Федот Николаевич олоҕун кэпсээнэ, номохтор, үһүйээннэр, от сабардамын быһаарар таблица, онтон да атын нэһилиэк историятын туһунан олус интириэһинэй матырыйааллар түмүллэн киирбиттэр. Кинигэ быйыл "Офсет" типографияҕа 100 экземпярынан бэчээттэнэн тахсыбыта. Кинигэни Сөдүөт сиэнэ СР үөрэҕириитин туйгуна, РФ үөрэхтээһиҥҥэ, иитиигэ бочуоттаах үлэһитэ, Мүрү орто оскуолатын физикаҕа учуутала Аммосов Николай Васильевич уонна кини кэргэнэ СР үөрэҕириитин туйгуна, "Уус Алдан улууһун үөрэҕириитигэр кылаатын иһин" бэлиэ хаһаайката, Мүрү орто оскуолатын саха тылын уонна литературатын учуутала Аммосова Валентина Ивановна хомуйан оҥордулар. Төрөөбүт дойдубут историятын кэлэр көлүөнэҕэ анаан сурукка тиһэн, кинигэ оҥорон таһаарбыккытыгар Николай Васильевичка уонна Валентина Ивановнаҕа нэһилиэк олохтоохторун ааттарыттан улахан махталбытын тиэрдэбит!