Миша Бурнашев уус-уран самодеятельноска улахан талааннаах ыччат этэ.
Кини 1939 сыллаахха соҕуруу театральнай училищеҕа үөрэнэ барыахтааҕа, күһүн уу суола сабыллан барбакка хаалар. Ол сыл Саха театрыгар үлэҕэ киирэр. Миша нөҥүө сылыгар Ленинград куоракка А.Н.Островскай аатынан театральнай институкка үөрэнэ барар. Саха сириттэн барбыт 32 оҕо профессор Леонид Федорович Макарьев кылааһыгар түбэһэллэр. Бастакы курстарын бары олус ситиһиилээхтик үөрэнэн бүтэрэллэр. Аҕа дойдуну көмүскүүр Улуу сэрии саҕаланаатын кытта студенннар бары буомбаттан куотар сири тутууга, куораты тула окуопа хаһыытыгар, танканы утары араас мэһэйдэри оҥорууга үлэлээбиттэр. Сорохторо фроҥҥа барбыттар. Атырдьах ыйын ортотуттан куорат өстөөх блокадатыгар киирбит. Бу кэмҥэ ас-үөл, оттук боппуруоһа кытааппыт. Сууккаҕа 125 грамм килиэбинэн аһаан да сырытталлар куорат иһин охсуһууттан ким да чугуйбатах. Миша Бурнашев олоҕун тиһэх күнүгэр диэри сындалҕаннаах үлэ үөһүгэр сылдьыбыт. 1942 сыл олунньу 23 күнүгэр театральнай институт студеннарын Ладожскай күөлүнэн эвакуацияҕа ыыппыттар. Бэрт уһун сири сатыы хаампыттар. Миша массыынаҕа кыайан тиийбэккэ охтубут. Курбуһах нэһилиэгин олохтоохторо биир талааннаах ыччата Михаил Бурнашев, Ленинград оборонатыгар сырдык тыына быстыбыт, хорсун санаалаах уолларын аатын умнубаттар.
“Уус Алданнар Аҕа дойду көмүскэлигэр" кинигэттэн
Михаил Бурнашев туһунан:
Васильев, Н. «Хаартан быкпыт сибэккилэр» / Н. Васильев // Бэлэм буол. – Муус устар 7 к. – С. 2.
Данилов, С. Хаарга өспүт сибэккилэр / Софрон Данилов // Хотугу сулус. – 1985. - № 5. – С. 65-68.
Окоемов, Н. Ленинград блокадата ыар дьылҕалаабыта / Николай Окоемов // Мүрү саһарҕата. – 2014. – Ыам ыйын 8 к. – С. 5.
Николаева, М. Эстибит эрэллэр, оонньоммотох оруоллар / Мария Николаева // Забота-Арчы. – 2008. – Ыам ыйын 22 к. – С. 14.
