Сылын аайы муус устар ыйга Курбуһах нэһилиэгин уһуйааннарын иитиллээччилэригэр Баал Хабырыыс хоһооннорунан "Күн бытархайа" уус-уран ааҕыы күрэҕэ ыытыллар. Бу ааҕыылар Уус Күөлүн "Чуораанчык" уһуйаанын уонна Уус Күөлүн модельнай библиотекатын тэрийиитинэн 2013 сылтан саҕалаан ыытыллаллар.

   Быйылгы "Күн бытархайа" СР Ил Дарханын Гранын ылбыт "Ийэ тыл эйгэтэ" бырайыак чэрчитинэн ыытылынна. Күрэх үөрүүлээх аһыллыытын Курбуһах орто оскуолатын 3 кылааһын үөрэнээччилэрэ (салайааччы Колмогорова М. М.) поэт олоҕун, айар үлэтин кэпсээн, "Күн бытархайа" ырыаны толорон киэргэттилэр. Уус-уран ааҕыы кыттыылаахтарын Курбуһах нэһилиэгин администрациятын баһылыгын солбуйааччы Аммосова А.И. эҕэрдэлээтэ.

   Оҕолор үс бөлөҕүнэн Баал Хабырыыс хоһооннорун аахтылар. Барыта 18 оҕо кытынна. Кыра бөлөххө - Аммосов Ярослав, орто бөлөххө - Пестрякова Сайаана, улахан бөлөххө - Слепцова Сияна кыайыылаах буоллулар. Кинилэр добун суруктарынан, мэтээллэринэн бэлиэтэннилэр. Бары кыттыбыт оҕолор оонньуур бириис тутан үөрэн-көтөн тарҕастылар. Уһуйаан иитээччилэригэр, төрөппүттэригэр Баал Хабырыыс айымньыларын кырачааннарга билиһиннэрэ, үөрэтэ сылдьалларыгар махталбытын тиэрдэбит.