Ахсынньы 12 күнүгэр Курбуһахтааҕы кырдьаҕастар уонна инбэлииттэр дьиэлэрин 30 сыллаах юбилейын чэрчитинэн семинар-практикум буолан ааста.

Манна республикабыт индомнарын үлэһиттэрэ кыттыыны ыллылар. Бу семинар тематынан 2 брошюра оҥоһуллан, бэчээттэнэн тахсыбытын кэлбит ыалдьыттарга билиһиннэрии буолла - “Советы гериатра по уходу и активизации когнитивных функций у пациентов с когнитивными нарушениями и деменциями” уонна “Нейротренинг для лиц с когнитивными нарушениями”. Бу брошюралар  3 нүөмэрдээх Республиканскай клиническэй балыыһа научнай-экспертнэй сэбиэтинэн бигэргэнэн, Российскай Федерация Президенин гранын фондатыттан үбүлэнэн “Дани-Алмас” типографияҕа бэчээттэнэн таҕыстылар. Брошюралары 3 нүөмэрдээх Республиканскай клиническэй балыыһа кылаабынай бырааһа Татаринова Ольга Владимировна уонна бу балыыһа гериатр-бырааһа Аммосова Евгения Егоровна хомуйан оҥордулар. Бу пособиелар толкуйдуур дьоҕурдара мөлтөөбүт дьон аймахтарыгар, социальнай үлэһиттэргэ, кырдьаҕастары уонна инбэлииттэри кытта үлэлиир специалистарга ананан оҥоһуллубуттар.  Хомуурунньуктарга Саха Республикатын геронтологтарын уонна гериатрдарын обществоларын “Школа активизации и ухода за дементными пациентами Нейро-Фит” диэн проектарын опытыгар олоҕурбут методическай уонна практическай көмө матырыйааллар киирбиттэр. Бу социальнай хайысхалаах бырайыак 2023 сыллаахха РФ Президенин Гранын ылары ситиспитэ уонна деменциялаах дьон дьиэ кэргэттэригэр практическай көмө оҥорор сыаллаах-соруктаах үлэлиир. Проект иккис чааһа Курбуһахтааҕы кырдьаҕастар уонна инбэлииттэр дьиэлэригэр ситиһиилээхтик олоххо киирэ сылдьар.