Сыл аайы алтынньы 15 күнүгэр Үрүҥ торуоска күнэ бэлиэтэнэр. Бу бэлиэ күн Көрбөттөр аан дойдутааҕы федерацияларын көҕүлээһининэн 1970 сыллаахха олохсуйбута. Бу күн сүрүн соругунан хараҕа суохтарга уонна мөлтөхтүк көрөр дьоҥҥо уопсастыба болҕомтотун тардыы, тулуурдаах сыһыаны олохтооһун буолар. Бүгүн Курбуһах орто оскуолатын 3 кылааһын үөрэнээччилэрэ Кырдьаҕастар уонна инбэлииттэр дьиэлэригэр ыалдьыттаатылар. Кинилэр хараҕынан мөлтөх кырдьаҕастарга "Сэттэ ини-бии" остуоруйаны, Ф.Тютчев "Весенняя гроза" хоһоонун ааҕан иһитиннэрдилэр. Олохтоохтор П.Лиза, В.Намыына "Ийэбэр" ырыатын долгуйа иһиттилэр, "Бу тугуй?"оонньууга көхтөөхтүк кытыннылар. Хараҕынан мөлтөх дьон кинигэни ааҕарга туһанар улаатыннаран көрдөрөр прибордарын оҕолор сэҥээрэ көрдүлэр. 

Британия худуоһунньуга Джеймс Бигс 1921 с. быһылаан кэнниттэн хараҕынан көрбөт буолбута. Хара торуоскатын туппутунан куоракка бэйэтэ сылдьарга күһэллибитэ. Суоппардар да, ааһан иһэр дьон да киниэхэ болҕомтолорун уурбат, кини хараҕынан көрбөтүгэр  кыһаллыбат курдуктара. Ол иһин,  Д.Бигс торуоскатын өҥүн уларытарга быһаарыммыта уонна үрүҥ өҥүнэн кырааскалаабыта. Итинтэн ыла ааһан иһэр дьон кинини өйдөөн көрөр, суолу туорууругар көмөлөһөр буолбуттара. Бигс торуоскатын үрүҥ өҥүнэн кырааскалаабытын Англияҕа уонна Европа дойдуларыгар көрбөт дьон үтүктэн барбыттара.