Биир дойдулаахпыт, Саха Республикатын культуратын үтүөлээх үлэһитэ, Уус Алдан бочуоттаах олохтооҕо, кыраайы үөрэтээччи Николай Саввич Пестряков хоһоон хомоҕой тылынан  библиотеканы маннык хоһуйбуттаах:

Библиотека – өй-санаа ырайа,

Библиотека – улуу бараммат кылааппыт,

Библиотека – бары норуот киэргэлэ,

Библиотека – барыбыт киэн туттуута.

   Кырдьыга даҕаны ааҕар балаҕаннартан саҕалаан библиотека үлэһиттэрэ билиини-көрүүнү тэҥэ, сырдыгы, кэрэни тарҕатан кэллэхтэрэ. Бүтүн Россиятааҕы Библиотека күнүн көрсө Н.С.Пестряков аатынан Уус Күөлүн модельнай библиотекатыгар "Библиотека - өй-санаа ырайа" нэдиэлэ ыытылынна. Курбуһах орто оскуолатын үөрэнээччилэригэр ветеран библиотекарьдар Пестрякова А.Д., Аммосова О.И. кыттыылаах библиотечнай уруоктар тэрилиннилэр. Библиотека ааҕар саалатыгар Уус Алдаҥҥа бастакы народнай библиотека тэриллибитэ 100 сылыгар анаммыт "100 сыл кэрэни, сырдыгы саҕан" кинигэ быыстапкатын ааҕааччылар нэдиэлэ устата сэргээн көрдүлэр, билистилэр. 

   Дьиэ-уот коммунальнай хаһаайыстыба Курбуһахтааҕы учаастага ититии сезонун этэҥҥэ түмүктээбитин бэлиэтиир күннэригэр ЖКХ ветераныгар, библиотека бастыҥ ааҕааччытыгар Леонтьев В.П. уонна Курбуһах орто оскуолатын алын сүһүөҕүн бүтэрээччилэригэр, библиотека ыытар "Ааҕыы чааһа" куруһуогун көхтөөх ааҕааччыларыгар эҕэрдэ суруктарбытын, кинигэ бэлэхтэрбитин туттардыбыт.

   Ыам ыйын 27 күнүгэр республикатааҕы "Кинигэ күүһэ" акцияҕа кыттыстыбыт. Бу акция быйыл алтыс төгүлүн ыытылынна. Быйылгы тэрээһин ааҕааччытынан Курбуһах орто оскуолатын 2 кылааһын туйгун үөрэнээччитэ, библиотека бастыҥ ааҕааччыта Прядезникова Лиза буолла. Кини "Чуораанчык" уһуйаан иитиллээччилэригэр Г.Х.Андерсен "Куһаҕан кусчаан" остуоруйатын доргуччу ааҕан иһитиннэрдэ.