Төрөөбүт тыл уонна сурук - бичик күнүгэр анаан сылын аайы ыытыллар  "Сахалыы диктаннарга" бөһүөлэкпит олохтоохторо көхтөөхтүк кытыннылар. "ТАПТЫЫР САХАМ ТЫЛЫНАН..." республикатааҕы диктант улуустааҕы түһүмэҕэр Курбуһах орто оскуолатыттан барыта 28 үөрэнээччи кыттыыны ылла. Үөрэнээччилэр тургутук боппуруостарга эппиэттээн, бэриллибит тиэмэ ис хоһоонун суолтатын арыйар үлэ суруйдулар. Өрөспүүбүлүкэтээҕи дьыктаан 3 - 4, 5 - 6, 7 - 8 кылаастары хабан бөлөҕүнэн ыытылынна.

   Олунньу 14 күнүгэр бөһүөлэкпит олохтоохторо «САХАЛЫЫ ДИКТАНТ» республикатааҕы тэрээһиҥҥэ кыттыннылар. Быйылгы диктаҥҥа поэт, прозаик Реас Алексеевич Кулаковскай төрөөбүтэ 110 сылыгар анаан  “Биир ууга үс хонук” кэпсээниттэн быһа тардан 191 тыллаах текст ааҕылынна.  Дьыктааны Курбуһах оскуолатын саха тылын уонна литературатын учуутала Макарова М.А. ыытта, бэрэбиэркэлээтэ. Түмүккэ  “Бастыҥ суруксут” анал аат Местникова  У.Д. туттарыллынна. Кыттааччылар үлэлэрин бэрэбиэркэлиир кэмҥэ  Пухова А.Е. олбохтору тигиигэ сүбэ-ама биэрдэ. Тэрээһиҥҥэ кыттыыны  ылбыт дьоммутугар махтанабыт.

   Саха республикатыгар биллэриллибит  Оҕо саас сылыгар уонна Төрөөбүт тыл, сурук-бичик күнүгэр аналлаах "Сахалыы дьыктааҥҥа"  "Чуораанчык" уһуйаан үлэһиттэрэ көхтөөхтүк кытыннылар.  Уйбаан Бахсылыырап "Иллээх дьиэҕитигэр" хоһоону улууһунан күргүөмүнэн ааҕыыга кыттыстылар.

   Тыл баар омук тыына, омук баайа. Ийэ тылбытынан ыраастык саҥарыахха, харыстыахха, үөрэтиэххэ! Сахалыы саҥабыт, сурукпут - бичикпит сайдан иһиэхтин!