1973 с. саха биллиилээх поэта Г.Г.Вешников-Баал Хабырыыс төрөөбүт дойдутугар Уу Чаабыйга "Ийэҕэ махтал" пааматынньык туруоруллубута. 

Баал Хабырыыс тыыннааҕар ийэтин Маайа уобараһын үйэтитэр санаалааҕын олоххо киллэрэр сыалтан кини кэргэнэ скульптор идэлээх Ольга Скубченко бу пааматынньыгы оҥорон поэт төрөөбүтэ 55 сылыгар Москваттан ыыппыта. Пааматынньыгы туруорарга Курбуһах орто интернат оскуолатын (дир.Чичахов А.Е.) 8-10 кылаастарын үөрэнээччилэриттэн 16 оҕо талыллан ыам ыйын 12-13 күннэригэр велосипедынан туристическай походка барбыттар. Поход салайааччыларынан оскуола иитэр үлэҕэ директоры солбуйааччы Кулаковскай А.Р., география учуутала Абрамов М.Н. уонна физкультура учуутала Пестряков А.Н. анаммыттар. Нэһилиэк кииниттэн Уус Күөлтэн 50 км сиргэ сытар Уу Чаабыйга диэри пааматынньыгы тириэрдиигэ оччотооҕу сельсовет (предс. Аммосов Д.Ф.) техниканан хааччыйбыттар. Пааматынньык ыраахтан айаннаан кэлэригэр табыгастаах буоллун диэн үс чааска арахсан кэлбит. Поход кыттыылаахтара пааматынньык турар сирин оҥорон, чаастарын цеменинэн холбоон олус үйэлээхтик оҥорон туруорбуттар. 2 күннээх поход түгэннэрин кэпсиир альбом-рапорт оҥоһуллан үйэтитиллэн хаалбыт.

      Бу бэлиэ тэрээһин 50 сылынан походка сылдьыбыт оҕолору кытта көрсүһүү Н.С.Пестряков аатынан Уус Күөлүн модельнай библиотекатыгар буолан ааста. Ыалдьыттарбыт памятнигы хайдах туруорбуттарын сиһилии кэпсээтилэр, атын сирдэргэ олохсуйбут оҕолор тэрээһиҥҥэ интернет ситиминэн холбостулар. Көрсүһүү кыттыылаахтара эдэр саастарын санаан, үөрэн-көтөн, астынан тарҕастылар.