Ахсынньы 13 күнүгэр Курбуһах интернат-оскуолатын 1970 сыллаахха бүтэрбит выпуск ыалдьыттаата.

Кинилэр “Үөрэммит кыһабытыттан кынаттанан” кинигэ-альбом таһаарбыттарын оскуола уонна нэһилиэк библиотекаларыгар бэлэхтээтилэр. Кинигэ  70 экземплярынан 2020 сыллаахха “Офсет” хампаанньаҕа бэчээттэнэн тахсыбыт. Бу олус тупсаҕай көстүүлээх, дириҥ ис хоһоонноох кинигэни Мигалкина Анастасия Гаврильевна хомуйан, Новгородова Матрена Викторовна компьютерга таҥан оҥорбуттар. Кинигэ Окоемов Павел Павлович киирии тылыттан саҕаланар, 3 түһүмэхтээх. “Кэрэҕэ сырдыкка уһуйбут учууталларбыт, иитээччилэрбит” диэн маҥнайгы түһүмэххэ оскуолаҕа үөрэнэр кэмнэригэр үлэлээбит директордарын, учууталларын, иитээччилэрин истиҥ, иһирэх тылларынан санаан-ахтан ааспыттар. “Оскуолатааҕы оҕо сааспыт доҕотторо” диэн кинигэ иккис түһүмэҕэр 1970 сыллаах выпустар араас сылларга бииргэ үөрэммит доҕотторун, үйэ аҥара олох суолун устун бииргэ тутуспутунан сылдьар кылааһынньыктар олоххо ситиһиилэрэ суруллубуттар. “Ааспыт сыллар ахтылҕаннара” диэн үһүс түһүмэххэ бииргэ үөрэммит, билигин биһиги кэккэбитигэр суох доҕотторун, оскуолатааҕы кэрэ кэмнэрин туһунан ахтыылар киирбиттэр. “Үөрэммит кыһабытыттан кынаттанан” кинигэ-альбом Анастасия Гаврильевна Мигалкина уонна Елизавета Михайловна Попова ыстатыйаларынан түмүктэнэр. Кинигэҕэ Аммосов Николай Васильевич, Захаров Николай Иннокентьевич, Крылов Семен Семенович, Аммосов Сергей Егорович уонна Попова Елизавета Михайловна альбомнарыгар киччэллээхтик уурулла сылдьыбыт хаартыскалар киэргэтэллэр. Ыалдьыттарбыт оскуола устун экскурсиялаан, ирэ-хоро кэпсэтэн, оскуолаҕа ыскамыайка, библиотекаларга араас кинигэлэри бэлэхтээн бардылар. Күндү дьоммутугар улахан махталбытын тиэрдэбит, доруобай, дьоллоох буолуҥ!