"Куорсун" литературнай күрэс улууспутугар айар куттаах дьону өйүүр, көҕүлүүр сыаллаах 2015 сылтан тэриллэн ыытыллар.

Сылын аайы кыттааччы ахсаана элбээн иһэр, өрүү кыттар дьону сэргэ саҥа ааттар ааттаналлар.  Быйыл күрэс кыайыылаахтарын, кыттыыны ылбыт дьон айымньылара "Куорсун-2021" хомуурунньукка түмүллэн таҕыста. Бу хомуурунньукка Курбуһах нэһилиэгиттэн хоһоон айыытыгар биһирэбил бирииһи ылбыт Анна Винокурова-Дьааҥы кыыһа "Улуу дойду - мин дойдум", "Успуорду күөрэччи тутуоҕуҥ!" хоһоонноро уонна кэпсээни суруйууга биһирэбил бирииһи ылбыт Мария Винокурова - Уйгулаах "Дьулус" кэпсээнэ киирдилэр. Дьокуускайга олорор биир дойдулаахпыт Василий Пестряков - Курбуһах уолун "Алааһым", "Дойдум миэнэ Курбуһаҕым" хоһоонноро күрэс хоһоону айыыга кыттыылаахтарын түһүмэҕэр киирдилэр. Айар куттаах биир дойдулаахтарбытын айымньыларгыт ааҕааччы киэҥ эйгэтигэр тахсыбыттарынан истиҥник эҕэрдэлиибит уонна айар умсулҕаҥҥыт уостубатын, суруйар дьоҕургут сайдан истин диэн баҕа санаабытын тиэрдэбит!