Балаҕан ыйын 22 күнүгэр И.В.Пухов аатынан Окоемовка сүрүн оскуолатын көҕүлээһининэн Саха сирин биллиилээх государственнай-политическай деятелэ Н.Н.Окоемов төрөөбүтэ 125 сылыгар аналлаах экскурсия-уруок ыытылынна.

Тэрээһин Окоемовка бөһүөлэгин скверигэр турар Н.Н.Окоемов пааматынньыгын таһыгар "Курбуһах нэһилиэгэ" МТ баһылыгын солбуйааччыта Аммосова А.И. эҕэрдэ тылыттан уонна тэрийээччи Пестряков Г.Д. уруок сыалын-соругун билиһиннэриититтэн саҕаланна. Салгыы Окоемовка уонна Уус Күөлүн үөрэнээччилэрэ, учууталлара Н.Н.Окоемов төрөөбүт алааһыгар - Дулҕа көлүйэҕэ - айаннаатылар. Манна тиийэн оҕолор Н.Н.Окоемов олоҕун уонна үлэтин туһунан Г.Д.Пестряков бэсиэдэтин иһиттилэр,  уолаттар С.С.Васильев-Борогонскай "Күөспүт оргуйар" хоһоонун бөлөҕүнэн ааҕыыга күрэхтэстилэр. Окоем күөлэ сайылыкка олохтоохтор эт, собо миининэн күндүлээтилэр. Салгыы Кырдалга турар Н.Н.Окоемов пааматынныгын таһыгар төрөөбүт дойду туһунан биирдиилээн хоһоон ааҕыытыгар күрэх ыытылынна. Сайылык олохтоохторугар махтанан, экскурсия кыттыылаахтара Окоемовка бөһүөлэгэр айаннаатылар. Манна кэлэн Окоемовка уонна Мүрү оскуолаларын үөрэнээччилэрэ Н.Н.Окоемов олоҕун уонна үлэтин сырдатар презентациялары оҥорбуттарын көрдүлэр, Окоемовка бөһүөлэгин библиотекара Местникова Л.П. Окоемов оҕолорун, аймахтарын туһунан быыстапканы билиһиннэрдэ, күрэхтэр түмүктэрэ таҕыстылар. Бу уруоктан оҕолор элбэҕи билэн-көрөн тарҕастылар.