100 сыл анараа өттүгэр, 1922 сыл ыам ыйын 19 күнүгэр, Владимир Ильич Ленин аатынан Пионерскай тэрилтэ баар буолбута.

Оччолорго Сэбиэскэй Сойуус оҕолоро 9 саастарыттан пионер кэккэтигэр киирэллэрэ. Кинилэр оҕо саастара «Эдэр пионердар, Сэбиэскэй Сойуус хомуньуус баартыйатын дьыалатын иһин мэлдьи бэлэм буолуҥ!» диэн  ыҥырыынан ааспыта. Пионер аалай хаалтыһа, барабаан дохсун тыаһа, гуорун – сэбиэскэй кэмнээҕи атрибуттары бары бэркэ диэн билэбит, өйдүүбүт. Билигин ол оҕолор бу кэмнэри олус истиҥник, сэргэхтик, дьоллоох оҕо саастарын кытта ситимнээн ахтан-санаан ааһаллар. Уус Күөлүн библиотекатыгар "Төлөн" ветераннар түмсүүлэрин чилиэннэригэр Пионерия 100 сылын бэлиэтиир тэрээһин буолла. Бочуоттаах ыалдьыппыт Курбуһах оскуолатыгар өр кэмҥэ пионер баһаатайынан үлэлээбит педагогическай үлэ ветерана Копырина Анна Афанасьевна нэһилиэкпитигэр пионерскай хамсааһын историятын билиһиннэрдэ. Итии үүттээх чэй иһэ-иһэ ыалдьыттарбыт оҕо саастарын ахтан-санаан аастылар, речевка ааҕан хаамтылар, пионерскай ырыалары ыллаатылар. Тэрээһин кыттыылаахтара  күлэн-үөрэн, оонньоон сэргэхсийэн тарҕастылар.