Улууспут уһук муннуга Курбуһах нэһилиэгэ кус быһый, ат бөҕө, ылбаҕай ырыаһыт, талааннаах тарбахтаах дьоннорунан былыргыттан сураҕырар. Омук эрэ сөбүлээн, умсугуйан дьарыктанар спорт уустук көрүҥүн тустууну пропагандалааччыларынан Курбуһахтар буолаллар.
Бу үрүлүйэр үрэхтэрдээх, ымыылаан ыллаһар хатыҥнардаах, "кэпсээ" диэбит курдук кэккэлэһэн кэбиспит тэҥкэ тииттэрдээх, куобах үөскүүр куруҥ тыалардаах үтүө-мааны сиртэн улуус эрэ аатын буолбакка, Саха сирин ааттатар үгүс тустуук үөскээн-төрөөн тахсыбыттарын үүнэр көлүөнэҕэ өйдөтөн ааһарбыт наадалаах. Кинилэртэн биирдэстэрэ көҥүл тустууга ССРС спордун маастара Наум Егорович Ермолаев биир көлүөнэ тустууктарын кэпсээниттэн кини кылгас эрээри чаҕылхай спортивнай олоҕу олорбутун билиҥҥи көлүөнэ истэн, ымсыыра, сөҕө саныыллар.
Наум 1947 сыллаахха Балаҕаннаахха Балбаара, Егор Ермолаевтарга - колхозтаах ыалга алтыс оҕонон төрөөбүтэ. Оскуолаҕа үөрэнэр сылларыгар тустуу Саха сиригэр саҥа саҕаланан эрэрэ. Кини тустууну оҕо сааһыттан интэриэһиргиир буолан, хаһыаттартан тустуу туһунан тахсыбыт ыстатыйалары кырыйан ылан альбом оҥостубут. Ону доҕотторугар ырытан кэпсиирэ. Өссө кыра кылаастарга үөрэнэ сылдьан уолаттары муннһан тренерэ, наставнига суох дьарыктанан, оройуоҥҥа киирэн күрэхтэһэн, сүргэлэрэ көтөҕүллэн тахсаллара. Наум оройуоҥҥа оҕолорго 1962-63-64-6ҕ сылларга чемпионаабыта. Төһө да оҕо буоллар, атын оҕолор хайдах тусталларын, туох албаһы оҥороллорун дьиҥнээх тренер курдук сыныйан көрөн, күрэхтэһии кэнниттэн уолаттарыгар кэпсиирэ, ырытара, дьарыктыыра. Бэйэтигэр сөп эттээх-сииннээх, кытаанах быыппастыгас быччыҥнардаах, күүрүгэс тымырдардаах, сэргэх ис-киирбэх сэбэрэлээх Наум кыраһыабай, күүстээх хамсаныылаах тустууларын астына көрөннөр, оройуон сүүмэрдэммит хамаандатыгар ылаллар. 1964 сыллаахха республика оҕолорго көҥүл тустуутугар чемпион аалай лиэнтэтин кэппитэ. Ити сыл өссө Дальнай Восток уонна Сибиир оҕолорго чемпионунан буолан, араадьыйаҕа аата аттанар, хаһыаттарга хайҕанар. Дьэ итинтэн ыла утаппыт киһи ууну иһэринии, тустууга өссө ылларан, сбордарга, күрэхтэһиилэргэ сылдьан тустар, маастарыстыбата үрдүүр. Оччотооҕу ыччат сиэринэн колхоз производствотыгар үлэлии-үлэлии, киэһэтин "тустуу" диэн баран "муннукка" ытаабыт Наум партизан Егоров туттарбыт оскуолатыгар паартаны хомуйтаран баран, баата матараас быраҕан уолаттары дьарыктыырын киһи сөҕө саныыр. Ити кэмҥэ сүдү тренер Д.П.Коркин таба көрөн, сбордарга Чурапчыга эрчийэн, улахан көбүөрдэргэ туһуннаран, Н.Е.Ермолаев республикаҕа биллэр тустуук буола үүммүтэ. 1968 сыл сааһыгар Советскай Армияҕа сулууспалыы баран, спортротаҕа эрчиллэр. 1968 сыл Дальнай Восток уонна Сибиир улахан көбүөрүгэр чемпион аалай лиэнтэтин кэппитэ. Эмиэ бу сыл ССРС Сэбилэниилээх Күүстэрин күрэхтэһиилэригэр миэстэлэһэн, бүдүрүйбэт сүһүөхтээх саха уола омуктары сөхтөрбүтэ. 1969 сылга Дальнай Восток уонна Сибиир улахан дьоҥҥо күрэхтэһиитигэр - III, Саха сирин норуоттарын спартакиадатыгар - I, Бүтүн Союзтааҕы турнирга эмиэ I миэстэни ылан өрөгөйө үрдээбитэ. 1970 сыл Наум тустуук быһыытынан сиппит-хоппут кэмин туоһутунан профсоюзтар Бүтүн Союзтааҕы күрэхтэһиилэригэр II миэстэни ылан көҥүл тустууга ССРС спордун маастарын аатын ылбыта.
1971-72 сылларга Наум тустууга олоҕор биир үтүө өйдөбүллээх сыллар буолбуттара. Н.Н.Тарскай бирииһигэр Саха АССР-га - II, Кемероваҕа Бүтүн Союзтааҕы турнирга - III, профсоюзтар Бүтүн Союзтааҕы турнирдарыгар II призердарынан буолбута.
1973 сыллаахха Наум Егорович Ермолаев үөрэҕин бүтэрэн, төрөөбүт төлкөтүн түстээбит Курбуһаҕар тустуу филиалын астарбыта. Үрдүк маастарыстыбалаах тустуук тренерскэй үлэтин, дьэ дьиҥнээхтик саҕалаабыта.1975 сылга олоҕун бүтэһик күннэригэр диэри Сахатын сиригэр күннээн-күөнэхтээн тустубута уонна пьедестал бастакы, иккис үктэллэриттэн түспэтэҕэ. Наум 62-68 киилэ ыйааһыҥҥа тустара. Тустууктар үгүстэрэ кини тустуутун кэтээн көрөллөрө уонна туһуннаҕына сирэйдиин-харахтыын уларыйан хааларын, түргэн реакциялааҕын, араас тус-туспа албаһы субуруччу олус түргэнник оҥорорун астына кэпсэтэллэрэ. “Баай фантазиялаах, кыраһыабай быраҕыылардаах тустуук” этэ диэбиттэрин мин “тустуу син биир искусство көрүҥэ” диэхпин баҕарабын.
У.Бурнашева
Мүрү саһарҕата. – 2001. – От ыйын 9 к.
