Курбуһахха доруобуйаларынан хааччахтаах дьон аан дойдутааҕы күннэригэр аналлаах декада саҕаланна. Бүгүн кырдьаҕастар уонна инбэлииттэр дьиэлэрин олохтоохторугар буойун суруйааччы Тимофей Сметанин төрөөбүтэ 105 сылыгар аналлаах «Өрүү тыыннаах хоһооннор» литературнай киэһэ буолан ааста. Тэрээһин саха литературатыгар чаҕылхай сулус буолан күлүм гынан ааспыт кылгас олоҕор бары жанрга өлбөт-сүппэт айымньылары хаалларбыт талааннаах суруйааччы Тимофей Сметанин олоҕун түһүмэхтэринэн ыытылынна. Бүгүҥҥү литературнай киэһэҕэ Курбуһах оскуолатын 3 кылааһын үөрэнээччилэрэ Н.Васильева, С.Винокуров, М.Афанасьева, В.Аммосов уонна индом олохтоохторо Т.З.Аммосова, К.М.Ябловская поэт хоһооннорун аахпыттарын сэргээтибит, Мария Пестерева толоруутугар «Манчаары туһунан ырыаны» долгуйа иһиттибит, «Куоскалар уонна саһыл» хоһоонугар олоҕуран оҥоһуллубут инсценировканы көрөн сэргэхсийдибит. Оруолларга Л.Прядезникова, Э.Барашков уонна И.Аммосов оонньоотулар. Сэргэх, киэҥ ис хоһоонноох тэрээһинтэн бары астынан, дуоһуйан тарҕастыбыт.
