ПЕСТРЯКОВ ВАСИЛИЙ ЕГОРОВИЧ-КУРБУҺАХ УОЛА

1962 сыллаахха Курбуһах нэһилиэгэр төрөөбүтэ. Новосибирскайдааҕы полиграфическай училищены бүтэрэн баран Алданнааҕы типографияҕа, Ю.А.Гагарин аатынан республикатааҕы типографияҕа үлэлээбитэ. Кэлин атыыһыттаабыта, билигин охраннигынан үлэлиир.  Хоһоонноро хаһыаттарга, хомуурунньуктарга бэчээттэнэллэр. Хас да хоһоонугар матыып суруллан ырыа буолбуттара. 2021 сыллаахха "Ыллыктаах ыраларым" диэн маҥнайгы хоһооннорун хомуурунньуга бэчээттэнэн тахсыбыта.

Дойдум миэнэ Курбуһаҕым

Күн сирин таламмын,
Күндүргүү көрөммүн
Күлүмнэс бу сааскылыын
Төрөөбүтүм  бу сиргэ.

Сүүрэр, көтөр,дыгыйар
Оҕо сааһым кэмнэрэ
Ааспыттара Курбуһахпар,
Ахтар саныыр дойдубар.

Маннык кэрэ дойдуга
Олорортон үөрэбин,
Дьоһун күммэр айхаллаан
Истиҥ хоһоон ыытабын.

 Курбуһахпар

Дойдубар Курбуһахха
Мин барыахпын баҕардым,
Аҕам төрүт алааһыгар
Бүтэйтээҕэр таластым.

Убайбар Халарыкка
Хонон-өрөөн аастарбын,
Көмүлүөгүн аттыгар
Аал уотугар итиннэрбин.

Кэпсээн,сэһэн буоламмын
Алаастары кэрийдэрбин,
Уруккуну санаһан
Үрэхтэри кэстэрбит.

Харахтарбар субу баар
Субай харта кэһиилээх,
Күндү уохтаах утахтаах
Гаанньа асчыт уоланнаах.

Көрдөөх-нардаах звено
Алтыспыппыт сайынын,
Доҕоттор, атастар дьоммутун
Ахтан санаан ааһыахпыт.

Дьэ, оччоҕо уоскуйуом
Үлэ дьонун көрсөммүн,
Сынньанаммын дуоһуйуом
Дойдум тыынын ыламмын.

 Халарык

Халарык сайылык барахсан
Салгына ырааһын, чэбдигин,
Сайыны санатан өрүүтүн
Санаабар ыалдьыттаан ааһаҕын.

Алаас оҕолоро мустаммыт
Оонньообут кэмнэрбит ааспыттар,
Суохтуубун ол күндү кэмнэрбин,
Сороҕор көрөбүн түүн түүлбэр.

Сөтүөлээн сөрүүкүүр чүөмпэбит
Сайылык анныгар күндээрэр,
Ардыгар күөл ыраас уутугар
Үтүллэр буолара илими.

Бостуукпут бэл сайдыыр саҥата
Ыраахтан иһиллэн ылара,
Ынах-сүөһү түптэҕэ мустара,
Ыам кэмэ кэлбитин саната.

Таптыыр, ахтар  сайылыкпытын
Саныахпыт мэлдьитин долгуйа,
Хаһан да, ханна да буолларбыт
Эйиэхэ эргиллэн кэлиэхпит.

 Халарык сайылыгым

Соҕуруу үрэхпит үрдүгэр
Халарык сайылык барахсан,
Эдэркээн сааспытын саната
Ыҥыра, угуйа турдаҕыҥ.

Сүүрбүт-көппүт күөх хонуубун,
Сайылыкпын өрүүтүн ахтабын,
Ынах-сүөһү мэччийэр
Нэлэмэн күөх хонуутун.

Чүөмпэ тымныы уутугар
Умсаммахтаан ыларбыт,
Илим көрө үөрэнэн
Балык миинэ иһэрбит.

Отчут дьоммут барахсаттар
Эрдэ туран оттууллара,
Ыанньыксыт кыргыттар
Ынах ыан  киирэллэрэ.

Түптэ унаар буруолаах,
Сайылыгым ферматыгар
Элбэх араас ыаллар
Сайылаан олороллор.

Сайылыгым тула  тыатыгар
Үөскүүллэр араас кыыллар,
Дьэдьэн уктаах тэллэҕэр
Сирин аһын арааһа.

Дьоһун-мааны остуолугар
Сахам аһа хотойбут,
Суорат, саламаат, лэппиэскэ,
Хойуу үүттээх чэйим.

Үрүҥ түүн буолаатын
Сайылыгым чуумпурар,
Утуйдум, сынньанным диэбиттии
Туман буолан налыйар.

 Алааһым

Алааспыт үөрэ көрүстэ
Мүөт салгынынан тыыннара,
Күөх дуолга көҥүл дьаарбата,
Сибэкки кэрэтин ууна.

Көҕөрөр халлааммар дайа
Күөрэгэй дьырылыы туойар,
Күөх хонуу маанылаах кыыһа
Хатыҥым суугунуу ыллыыр.

Кэрэтиэн төрүт алааспыт,
Сүүрбүт-көппүт кырдалларбыт,
Оҕо сааспыт ааспыт кэмэ,
Ойор күммүт сарсыардата.

Муһуннубут бары бүгүн
Арчыланан, алгыстанан,
Айылҕаҕа сүгүрүйэн
Уруй-айхал этээрибит.

 Соҕуруу үрэхпэр

Самаан сайын кэлиитэ,
Соҕуруу үрэх кытыыта
Сардаананан, оо, симэнэр,
Олус кылгас кэмнэргэ.

Сахам сирин сардааната
Саамай кэрэ сибэккитэ,
Киэркэтэҕин үрэхпитин
Дьону үөрдэ, биһирэтэ.

Көрөн-истэн бүөбэйдээн,
Күндү бэлэх оҥостоммут
Күннэтэ көрө сылдьаары,
Хаартыскаҕа түһэрэбит.

Үрэх кытылын батыһан,
Үйэлэргэ эн сандааран
Тураргыттан үөрүөхпүт,
Саһарҕалыын тэҥҥэ кыыһан.

Дойдум айылҕата айманар

Сүрэхтэн кутуллар иэйиибин
Хоһуйан көрүөхпүн хайа сах
Санаабар хааллаҕа сөҥүөрэн,
Хараастыы санньыарын ыллатан.

Айылҕам кэхтиитин бу көрөн,
Аймалҕан иитигэр куустаран,
Сүһүрбүт бу иэйиим тумнаста
Дууһабын кымыстыы ытатта.

Бырастыы, айылҕам барахсан,
Көрөбүн кытыаста кыыһаргын,
Төлөҥҥө тулалыы куустаран
Буруоҕа тумнаста ытыыргын.

Хатыһар кыаҕа суохпуттан
Сүрэҕим өрүтэ мөхсөөхтүүр,
Санаалыын быыппастар мин өйүм,
Бырастыы, алтыспыт айылҕам.

 Балаҕаннаахпар   

Төрөөбүт мин дойум,
Олоххо бу дьолум.
Олус да чугаскын
Балаҕаннаах Саппыйата.

Ойон тахсар күннээх,
Күөх хонуу кырдалбар
Кырачаан оҕо сааһым
Ааспыта элэҥнээн.

Оскуолаҕа үөрэммит
Үөрэх күргүөм кэмим,
Үлэлээбит хотонум
Бааргыт өрүү дууһабар.

Олорор олохпор
Аартыгы арыйбыт
Үөскээбит алааспын
Саныыбын ахтабын.