ЕРМОЛАЕВА АГАФЬЯ ЛАВРЕНТЬЕВНА

     1954 сыллаахха Уус Алдан оройуонугар Окоемовка бөһүөлэгэр төрөөбүтэ. Воспитатель идэлээх. Уус Күөлүн “Чуораанчык”  уһуйааныгар иитээччинэн 1976 сыллаахтан бочуоттаах сынньалаҥҥа тахсыан диэри үлэлээбитэ. Педагогическай үлэ ветерана.

       Агафья Лаврентьевна “Куду” литературнай түмсүү чилиэнэ, детсакка үлэлиир кэмигэр оҕоҕо аналлаах тэттик хоһооннору суруйан үлэтигэр туттара, хомоҕой тылынан истиҥ иэйиилээхтик айылҕа, олох туһунан хоһооннору суруйар. Кини нэһилиэк уус-уран самодеятельноһыгар, ветераннар түмсүүлэригэр көхтөөхтүк кыттар. Билигин Агафья Лаврентьевна сиэннэрин бүөбэйдэһэр.

 Оскуолаҕа барыахпыт

Элбэх остуоруйаны истэн,

Хоһоону, ырыаны билэн,

Элбэххэ, үтүөҕэ үөрэнэн

Оскуолаҕа барыахпыт.

 

Үөрэппит иитээччилэрбит,

Ииппит ньээҥкэлэрбит,

Күндү дьоммут эһиэхэ

Баһыыба тылларын этэбит.

 

Иитиллибит детсаппытын

Өрүү саныы сылдьыахпыт,

Сүрэхпитигэр саһыаран

Өрүү илдьэ сылдьыахпыт.

 

 

 

Ийэбэр

                Анастасия Ивановнаҕа

Төһө да сааһырдарбын

Өрүүтүн ахтабын ийэбин,

Кини нарын куолаһын

Билигин да истэр курдукпун.

 

Умнубаппын  ийэм

Илиитин сылааһын,

Оҕолуу истиҥ мичээрин,

Истиҥ, эйэҕэс хараҕын.

 

Үөрэммит оскуолам

Үөрэммит оскуолабын

Куруутун саныыбын,

Үөрэппит учууталларбын

Бу баардыы көрөбүн.

 

Кыырыктыйбыт баттахтарын

Атыҥырыы да көрөбүн,

Сылаас,истиҥ куоластарын

Куруук ахта саныыбын.

 

Бүгүн манна кэллибит

Оҕо сааһы санаһа,

Мэник-тэник кэммитин

Умнубакка ахтыһа.

 

Оскуолаҕа кэлэммит

Оҕолорбутун көрсөн,

Истиҥник кэпсэтэн,

Эдэрбитигэр түстүбүт.

 

Саас кэлиитэ

Сахам сирин сааскыта

Олус кэрэ көстүүлээх,

Кини уһуктар айылҕата

Ордук сүрэххэ чугас.

 

Сааскы сөрүүн салгын

Сүрэҕи сөрүүкэтэр,

Сахам сирин дьонун

Сылаас тыынынан кууһар.

 

Ийэҕэ таптал

Ийэ итии таптала,

Ийэ нарын дьүһүнэ,

Ийэ сылаас илиитэ,

Ийэ уйан сүрэҕэ.

 

Киһиэхэ баар ийэтэ

Туллубат тутааҕа,

Күндүттэн күндүтэ,

Кэрэттэн кэрэтэ.

 

Ийэ баар буолан

Олох баар, салҕанар,

Ийэҕин убаастаа,

Ийэҕин харыстаа.