ВИНОКУРОВА МАРИЯ ИВАНОВНА
1969 сыллаахха Уус Алдан улууһун Сыырдаах бөһүөлэгэр күн сирин көрбүтэ. Амурскайдааҕы культурнай-сырдатар училищены бүтэрбитэ. Билигин Курбуһахтааҕы кырдьаҕастар дьиэлэригэр культурнай-маассабай тэрийээччинэн үлэлиир.
Саха Өрөспүүбүлүкэтин социальнай сулууспатын туйгуна, өрөспүүбүлүкэ социальнай тэрилтэлэрин икки ардыларыгар ыытыллыбыт күрэххэ “Айымньылаах үлэтин иһин” анал аат кыайыылааҕа. “Мүрү саһарҕата” хаһыат общественнай корреспондена. Кэпсээнэ “Мин маҥнайгы тапталым” хомуурунньукка бэчээттэммитэ. “Социокультурная реабилитация пожилых и инвалидов” методическай көмө брошюра, “Үйэ чиэппэрэ социальнай эйгэҕэ”, “Тыыннаах хаартыскалаах” альбом автора.
***
Убаастыыр дьүөгэбэр Елизавета Петровнаҕа
олоҕун орто омурҕанын үбүлүөйдээх күнүгэр анаан
Дьүөгэбин саҥалыы мин көрдүм
Уонна олуһун диэн үөрдүм,
Сирэйэ атыннык сырдаабыт,
Хараҕа ураты уоттаммыт.
Дууһатын ис кэрэ санаатын
Таһыгар таһааран сыдьаайбыт,
Толору дьолунан дуоһуйан
Холкутук мичээрдээн мичийбит.
Эдэрдии эрчимнээх бэйэтин
Долгуйа хайгыыбын, сөҕөбүн,
Бар дьонун дьолуттан үөрэрин
Киэн тутта бэлиэтии көрөбүн.
Үтүөкэн дьүөгэбэр истиҥник
Махтанан тураммын этэбин:
Өрүүтүн бу курдук кэрэтик,
Ыллыктаах үтүөкэн санаанан
Бар дьоҥҥун алгыстаах тылгынан
Арчылыы, харыстыы сылдьаргар.
***
Сааскы булка бэлэмнэнии
Саҕаланна ыал аайы
Сиргэ барар таҥас-сап
Сыымайданар, наарданар.
Сааны сотуу, ботуруону
Саппааһыран хаһааныы.
Сэргэхсийии, киирии-тахсыы
Сэһэн-сэппэн дэлэйэр.
Хаһан, ханна аан бастаан
Куһу көрбүт ахтыллар,
Эрдэһиттээн бултуйбут
Сааһыт өрүү хайҕанар.
Сааһыт, булчут эр дьоммутун
Алаадьылаан атаарабыт,
Байанайгыт мичик гынан
Баардааҕыттан маанылаатын!
***
Куруутун аттыгар буолуохпун олуһун баҕарар эбиппин...
Ол иһин эйиэхэ анааммын хоһооммун суруйан эрэбин.
Билэҕин, кыһыҥҥы дьыбарга,
Туманнаах тымныыга иэдэскин
Кыратык хаарыйа былаастаан
Туох эрэ кымаахтаан ыларын?
Эйигин кытары буолаары,
Кыратык оонньоһон ылаары
Тымныы кыыс буоламмын иэдэскин
Тарыйан мин ылар буоллаҕым!
Билэҕин, саас аайы чаҕылхай,
Сандаарар күннэрдээх кэмнэргэ,
Хараххын саатырда көмүс күн,
Эйигин кууһардыы көрөрүн?
Эйигин кытары буолаары,
Кыратык оонньоһон ылаары
Сырдык күн сарыала буоламмын
Эйиигин арыаллыы сылдьабын!
Билэҕин айылҕа барахсан уһуктар,
Чэлгийэр үтүөкэн кэмигэр
Сиккиэр тыал оргууйдук сипсийэн
Өрүүтүн аттыгар буоларын?
Эйигин кытары буолаары,
Кыратык оонньоһон ылаары
Куйааска сөрүүн тыал буоламмын
Эйиигин оргууйдук кууһабын!
Билэҕин көмүстүү дуйдаммыт
Курус да, үтүө да күннэргэ
Ардыгар ардахтаах кэмнэргэ
Үөһэттэн тэлээрэр сэбирдэх
Санныгар олорсон ыларын?
Эйигин кытары буолаары,
Кыратык оонньоһон ылаары
Саһархай сэбирдэх буоламмын,
Саһабын санныгар сытаммын!
***
Мин бүгүн көрүстүм кинини
Оргууйдук үрүҥ хаар баттаҕын
Салҕалас илиитинэн көннөрөн
Турара киэҥ аартык үрдүгэр.
Өссө да уоттааҕа хараҕа,
Өссө да тыыннааҕа куолаһа,
Өссө да чиргэллик үктэнэн
Утары кэлбитэ миэхэҕэ.
Ол онно эмискэ дууһабар
Туох эрэ киирбитэ кистэлэҥ.
Алыптаах эйгэҕэ уйдаран
Иһиттим мин кини этиитин:
“Хаһан да самныма саҥаттан,
Эйиигин хараардар тыллартан,
Өрүүтүн төбөҕүн үрдүктүк
Көтөҕөн эн сылдьаар куруутун!”
***
Дьоллоох буолуоххун баҕардаххына
Дьолу баҕар тулалыыр дьоҥҥор!
Үөрэ сылдьыаххын баҕардаххына
Үөр-көт дьон үөрүүтүн үллэстэн.
Харгыс тылы иһиттэххинэ
Хомойон, хоргутан турума.
Харыстаа сүрэҕин сылааһын
Итэҕэй сырдыгы, ырааһы.
Санаарҕыыр, санньыйар күннэргэр
Санаан кэл үөрүүлээх кэмнэргин.
Оччоҕо дууһаҕар чэпчиэҕэ
Олоххо дьулуурун күүһүрүө.
Дьоллоох буолуоххун баҕардаххына
Дьолу баҕар тулалыыр дьоҥҥор!
