Олоҕу көрүү
Олоҕу көрөбүн кини хайдах баарынан
Муударай бэйэлээх күн күбэй ийэлии,
Дуулаҕа быччыҥнаах бухатыыр уоланныы
Түгэҕин булуохпун ончу диэн билбэппин.
Олоҕу көрөбүн күнтэн күн сонуннук
Самаан сайын сиэдэрэй симэҕинии,
Оччоҕо симэнэр ыһыахха киирэрдии
Эриэккэс бэйэлээх Хотун хаан дьахтардыы.
Олоҕу көрөбүн оҕолуу атыннык
Саҥа күн тахсарын кэтэһэ,
Сүктэр кыыс кэриэтэ ып-ыраас бэйэтин
Аналын көрдүүрдүү оргууйдук устарын.
Олоҕу көрөбүн уон араас өҥүнэн
Оонньотон, киэргэтэн, кырыылаан-чочуйан,
Оччоҕо тэҥниибин дууһабар саһыара
Бастакы тапталбын дуулаҕа хотойбун.
Олоҕу көрөбүн мин кэтэх өттүттэн
Оччоҕо бааллырар, силлиэрэр дохсуннук,
Тэһиинин туттарбат айаас ат кэриэтэ
Муннарар, сүтэрэр айаныҥ суолуттан.
Олоҕу көрөбүн дууһалыын ылынан
Хараастар мунчаарар санньыйар кэмнэрбэр,
Ыллыктаах киэҥ суолга ыҥыра угуйа
Санаабын көтөҕөр холоонноох доҕорго.
Олоҕу көрөбүн сааһыран олорон
Сүр күүскэ олоххо тапталым улаатар,
Оччоҕо дууһалыын сырдыыбын, иэйэбин
Иккистээн тиллэбин бу орто дойдуга.
Олоҕу көрөбүн кустукка суулааммын
Көлүөнэ ыччаттыын уруйдуу-айхаллыы,
Өрүүтүн күүркэйэ сайда тур бу курдук
Мин уран дууһабар, кутуллар тойукпар!
Санаа эргиирэ
Хомолто тыллара тахсаллар
Буойары-хаайары тумнаннар,
Тохтоллор харахтар уулара
Ыарыынан сүрэҕи хаарыйан.
Тууйуллар өй-санаа ардыгар
Дууһаны ытатан-соҥотон,
Оччоҕо мунаҕын тумаҥҥа
Түгэҕэ биллибэт далайга.
Буурҕа тыал ытыллар санньыардык,
Күн тыгар былыты быыһынан.
Өй-санаа уһуктар бытааннык,
Олоххо тардыһар иккиһин.
Үөрэҕин оччоҕо оҕолуу долгуйан
Ньургуһун тылларын көрөҥҥүн,
Көй салгын мүөт сыттаах дуолугар
Күөрэгэй ырыатын сэҥээрэ.
Үөрэҕин ийэлии истиҥник
Күн сырдык уотугар махтанан,
Ийэ сир сып-сырдык ньууругар
Олох диэн эриэккэс тыл баарыттан.
Үөрэҕин сааһыран олорон
Арааһы эргитэ санааҥҥын,
Дууһалыын сырдыыгын, иэйэҕин
Муоһаҕын табатык салайкар!
Хаар үҥкүүтэ
Олохпор көрүстүм үгүстүк
Бастакы хаар кыыдамнаан түһэрин,
Ол эрэн көрбөтөх эбиппин
Кырпай хаар кэрэчээн үҥкүүтүн.
Нууһараҥ киэһэҕэ дьаарбайа
Тыа устун хаамабын оргууйдук,
Тулабар кутуллар музыка
Бастакы тапталы саната.
Хаар түһэр, хаар ыллыыр
Дьиэрэҥкэй үҥкүүтүн түһэрэн,
Саҥа хаар, сырдык хаар
Сүрэхпэр үөрүүнү сахтыҥ эн.
Уон араас өҥүнэн оонньооннор
дьиэрэҥкэй тэбэллэр кэрэтик,
Тапталы, үөрүүнү, сырдыгы
Түстүүллэр бар дьоҥҥо кинилэр.
Уоллаах кыыс оргууйдук сипсиһэн
Аастылар дьоллоохтук мичээрэ,
Бу курдук ыраастык кэрэтик
Тыргылла туруохтун суоллара.
Кырпай хаар, саҥа хаар
Дьол вальса буолаҥҥын түһүүй эн.
Эргичий, мичилий, күлүмнээ
Бэлэхтээ бар дьоҥҥо үөрүүнү.
Курбуһаҕы таптыыбын
Сибэккинэн симэнэн
Сиэдэрэйкээн хонуулаах,
Алаастарын муҥунан
Толуу оттоох ходуһалаах.
Ыра санаам ыллыгын
Курбуһаҕы таптыыбын!
Сыспай сиэллээх тоҕуоруспут
Толооннордоох үрэхтээх,
Үүттээх сүөгэй далбардаах
Сайылыга да үгүс.
Ыра санаам ыллыгын
Курбуһаҕы таптыыбын!
Үтүө кэрэ ыралаах,
Үүнэр сайдар ыччаттаах
Дьоһун-мааны үтүө үгүс
Ытык кырдьаҕас дьоннордоох.
Ыра санаам ыллыгын
Курбуһаҕы таптыыбын!
Талыы талба кийииттэр,
Ньургун Боотур күтүөттэр
Сөбүлээннэр олороллор
Курбуһаҕы таптааннар
Ыра санаам ыллыгын
Курбуһаһы таптыыбын!
Эдэр сааһым үтүө кэмин
олох дохсун баалыгар
Үлэ күргүөм үөһүгэр
Атаарбытым бу манна.
Ыра санаам ыллыгын
Курбуһаҕы таптыыбын!
Олох дьолун үөрүүтүн,
Оҕо сырдык мичээрин,
Дууһам иэйэр ырыатын
Алгыс гынан ыллыыбын.
Ыра санаам ыллыгын
Курбуһаҕы таптыыбын!
Ахтылҕан
Өрүүтүн ахтабын, суохтуубун
Төрөөбүт алааспын эйигин
Оҕо саас кэрэ чуор куолаһа
Чугдаарар эн ааккын кытары.
Саас аайы кэлэбин бу манна
Сардаана сибэкки тыллыыта
Сүрэҕим долгуйар ырыатын
Сипсийэн ыллыыбын оргууйдук.
Ыллыыбын ахтылҕан ырыатын
Күөх нуолур урсуҥҥар уйдаран
Лыах буолан тэлээрэ көтөбүн
Мүөт сыттаах сибэккин үрдүнэн.
Иккистээн эргиллэр оҕо саас
Күн көрөр, күн үөрэр үөһэттэн
Кэрэҕиэн даҕаны эдэр саас
Үөскээбит үрэҕим, алааһым.
