ВЕРЕВКИН РУДОЛЬФ ИВАНОВИЧ

    Бүлүү оройуонугар Чочу нэһилиэгэр 1946 сыллаахха төрөөбүтэ. Бүлүү педагогическай училишетыгар, Саха государственнай университетыгар үөрэнэн история учуутала идэлээх. Уус Алдан, Амма, Бүлүү, Нам оскуолаларыгар өр кэмҥэ учууталынан үлэлээбитэ. Саха Республикатын үөрэҕириитин бочуоттаах бэтэрээнэ. Хабылыкка, хаамыскаҕа өрөспүүбүлүкэ хас да төгүллээх кыайыылааҕа, бу көрүҥнэргэ өрөспүүбүлүкэ күрэхтэһиилэригэр судьуйалыыр. “Оһуохай” уопсастыба чилиэнэ, Саха Өрөспүүбүлүкэтин үтүөлээх этээччитэ.

    Рудольф Иванович тэттик кэпсээннэрэ “Ленинскэй тэрийээччи”, “Туймаада”, “Кыым” хаһыаттарга, “Кыраһа суруга”, “Күрүлгэн” сурунаалларга бэчээттэммиттэрэ.

 

“Кэҥсик-муҥсук сыттардаах” ырыа матыыбынан

(пародия)

Олоҕум улахан аҥаарын

Соҕотох сылдьан бараммын

Оһуохай түмсүү киһитигэр

Ойох тахсан абыранным.

 

Оһуохайдаах, тойуктаах

Улуу Сунтаар оҕолоро

Олоҕун булбут  дэһэннэр

Ороһуйбат буоллулар.

 

Ньургун-хоодуот майгылаах

Ньурбаларым хоһууннара

Оҕонньордоох дэһэннэр

Оонньоколоспот буоллулар.

 

Аламаҕай майгылаах

Алын-Үөһээ Бүлүүлэр

Аналлааҕын булбут диэн

Аалыҥнаспат буоллулар.

 

Кэпсэл буолбут соболоох

Кэбээйиттэн кэлбиттэр

Кэргэннээхпин билэннэр

Кэлбэт-барбат буоллулар.

 

Уоннуур тарбах төбөтүнэн

Улуу дорҕоон оҥорор

Оҕонньорбун кытары

Олоруохпут биһиги.

 

Харахтар

Орто дойду оҕото

Киһи муҥнаах сороҕор

Өркөн өйө-санаата

Өһөх курдук хараарар.

 

Оччоҕуна куруутун

Хантан эрэ ыраахтан

Икки чоҕул харахтар

Одуулууллар аһынан.

 

Ааспыт үгүс сылларым

Ардахтара-хаардара

Сүрэх дьикти кистэлин

Сатаан саппат эбиттэр.

 

Бу харахтар баар буолан

Угуттууллар дууһаны

Өрүһүйэр курдуктар

Өлөн-өһөн барыаҕы.

 

Христофор Максимовка

Музам киирбит күнүгэр

Мэлдьи миэхэ көстөҕүн -

Туттан-хаптан турарын,

Маҥан дьураа баттаҕыҥ.

 

Илэ-чахчы иһиллэр

Дьикти кэрэ куолаһыҥ,

Кыллыгырыы суккуллар

Дьүрүһүйэр матыыбын.

 

Күөх халлааҥҥа күөрэгэй

Дьурулуурга дылы ээ,

Биитэр күөлгэ хомустар

Суугунуурга дылылар.

 

Чакыр тааска сүүрүктэр

Кылырдаһа усталлар,

Дириҥ сиэпкэ манньыаттар

Лыҥкыныһа тыаһыыллар.

 

Эн куолаһыҥ дьиктитин

Туохха сатаан тэҥниэмий,

Эн талааныҥ дириҥин

Ханнык быанан кэмниэмий.

 

Кыайыы күнүн чиэһигэр оһуохай

Улуу Кыайыы буолбута

Үбүлүөйдээх сылынан

Оһуокайбыт тылынан

Уруйдааммыт көрсүөҕүҥ,

Эһиэкэйбит тылынан

Эҕэрдэни этиэҕиҥ.

 

Маннык дьоллоох олоххо

Олорорбут туһугар

Алдьархайдаах сэрииттэн

Төннүбэтэх дьоммутун

Ахтан-санаан ааһыаҕыҥ,

Уйадыйан ылыаҕыҥ.

 

Үгүс үтүө дьоннорбут

Үлүгэрдээх кыргыһыы

Толоонугар охтоннор

Илин-арҕаа дойдулар

Халлааннарын анныгар

Буору кытта буор буолан

Сыттахтара билигин.

 

Биһигини бу күҥҥэ

Тэҥҥэ бииргэ олорор

Ветераннар эһиэхэ

Истиҥ сылаас тылынан

Эҕэрдэни этэбит,

Уйан чараас сүрэхтэн

Уруй-айхал аныыбыт.

 

Харыан ветеран дьоннору

Харах харатын кэриэтэ

Харыстыаҕыҥ кинилэри.

Үрүҥ күнүм анныгар

Орто туруу дойдубар

Үйэлэргэ-саастарга

Туругура туруохтун

Үлэ, үөрэх, эйэ, дьол!

 

Оҕо ыһыаҕа

Дьээ буо...

Сайын үүммүт үөрүтүгэр

Оҕо дьоммут мустан

Улуу тунах ыһыаҕы

Олохтоотохторо буоллун,

Үрүмэччи курдук көҥүл босхо

Көрүлээтэхтэрэ буоллун.

Чыычаах курдук чырып-ирип

Ыллаатахтара буоллун,

Кэлбит үтүө сайыны

Уруйдаатахтара буоллун.

 

Оҕолорум барахсаттар,

Көмүс чыычаахтарым,

Үйэлээх сааскытыгар

Үөрүү-көтүү аргыстастын.

Устар олоххут тухары

Ыарыы-сүтүү ылбатын,

Дьаҥ-дьаһах таарыйбатын

Уоттаах харах көрбөтүн,

Сытыы тыллаах эппэтин,

Алгыс баһа сыаланнын.