ВАСИЛЬЕВА ТАТЬЯНА АФАНАСЬЕВНА

(1947-2019)

          1947 сыллаахха Уус Алдан оройуонугар Дүпсүн нэһилиэгэр төрөөбүтэ. Олоҕун аргыһын Васильев В. Р. көрсөн, кэргэн тахсан Курбуһахха олохсуйбута. Уус Күөлгэ спортзалга уборщицанан, балыыһаҕа санитарканан үлэлээн пенсияҕа тахсыбыта. Улахан дьиэ кэргэн ийэтэ, эбэтэ, хос эбэтэ этэ.

           Васильева Т. А. улууска күүстээх саахымаччытынан, дуобаччытынан биллэрэ. Кини туйаҕын хатаран билигин Татьяна Афанасьевна оҕолоро, сиэннэрэ бу остуол оонньууларыгар үрдүк ситиһиилэннилэр.

           Татьяна Афанасьевна Уус Күөлүн библиотекатын иһинэн тэриллибит “Куду” литературнай түмсүү көхтөөх чилиэнэ этэ. Нэһилиэк, улуус иһинэн ыытыллар литературнай конкурстарга кыттан миэстэлэһэрэ.

Иэйии

Киирэр эбит киһиэхэ

Эрдэлээн эбэтэр хойутаан

Иэйии дьикти күүһэ

Айар санаа эмискэ.

 

Айар санаа киирбиччэ

Олоро түһэбин чочумча,

Өйбүн-санаабын сааһылаан

Холонон көрөбүн хоһооҥҥо.

 

Үрэллэн хаалыма айар санаа

Иэйии аптаах күүһэ,

Санаам ситимин утахтарын

Тиһэн иһиэм илиискэ.

 

Дьылҕабар махталым                 

Көрсүбүппүт биһиги

Оонньуу киэһэ кулуупка,

Көрсүһэ түспүт харахтарбыт

Быһаарбыттара дьылҕабытын.

 

Сиэттиһэн хаамсарбыт

Сулустары ааҕаммыт,

Халлааны сырдатан

Саҥа күнү көрсөрбүт.

 

Сананарбыт дьоллоохтук

Хас көрсүһүү аайытын,

Тэбиэлиирэ чаастатык

Ахтыспыт сүрэхтэрбит.

 

Сыһыары тардаҥҥын

Ыксары кууһарыҥ,

Таптыыбын диэн сибигинэйэн

Кулҕаахпар этэриҥ.

 

Тулуйбакка кэтэһэрбит

Хас көрсүһэр чааспытын,

Билбэккэ да хааллыбыт

Хас сыл ааспытын.

                                                

Эмчит түбүктээх үлэтэ

Курус санааҕа куустаран

Сытабын балыыһа куойкатыгар,

Эрэх-турах санаалаах

Үчүгэйи эрэ кэтэһэбин.

 

     Курус санааны кыйдаан

     Үүммүт саҥа күммүт

     Көмүс сардаҥатын кыырпаҕа

     Палата иһигэр ыһылынна.

 

Аламай күнтэн үөрэн

Уһукта биэрдим көнньүөрэн,

Сырыы аайы саҥаттан

Тахсар күнү уруйдаан.

 

     Саҥа күннүүн үөрэн

     Киирэн кэллэ сиэстэрэм

     Аптаах сытыы иннэтин

      Буллара оҕуста миэстэтин.

 

Итэҕэйдим манна чахчы

Эмчит түбүктээх үлэтин,

Сыралаах үлэтин түмүгүн

Ыарыһах туран сүүрэрин.

                                          

 Үтүө дойду Курбуһах

Үтүө мааны майгылаах,

Көрдөөх-нардаах ыччаттаах

Үлэни өрө туппут

Бастыҥ үлэһит дьоннордоох.

 

  Күлүмнэс уулардаах

   Балык үөскүүр күөллэрдээх,

   Көнө налыы хонуулаах

   Чыычаах ыллыыр алаастаах.

 

Куобах үөскүүр куруҥнаах

Хатыҥнардаах чараҥнаах,

Элбэх үрэх холбоһор

Кырдьык кэрэ да дойду.

 

   Дьолбун булбут дойдубун

   Курбуһаҕы таптыыбын,

   Хоһоонунан хоһуйан

   Ырыа гынан ыллыыбын.

 

Ыалдьыбат туһугар

Ыарыыттан эмискэ мөлтөөн

Амсайбатым ыам балыгын,

Сиэппэтим хараан бырдаҕар,

Буспатым от ыйын куйааһыгар.

 

Туура тарпатым атырдьах ыйын

Минньигэс сирин аһын,

Билбэтим дьахтар сайынын,

Биллэн ааһар балаҕан ыйын.

 

Ааһа оҕустулар биллибэккэ

 Алтынньы түбүктээх күннэрэ,

Сыа сыымайдыыр сэтинньи ыйтан

Олоруом аны ыалдьыбат туһугар!