Ыам ыйын 18 күнүгэр Саха сиригэр 2004 сыллаахтан Ньургуһун күнэ бэлиэтэнэр. Бу бэлиэ күҥҥэ аналлаах Курбуһахтааҕы кырдьаҕастар дьиэлэригэр «Ньургуһун кырдала» күрэх ыытылынна.
Оонньууга 5 үстүү киһилээх (1 үлэһит, 2 олорооччу) хамаандалар эрдэттэн бэлэмнэнэн, ох курдук оҥостон, ыалдьааччылардаах кэлэн кытыннылар.
Күрэх 4 түһүмэҕэ биир тыынынан ааста — араас матырыйаалтан ньургуһуну оҥорон аҕалыы, ньургуһун туһунан боппуруостарга эппиэттээһин, матыыбынан ырыаны таайыы уонна бэриллибит тыллары туһанан тута хоһоон айыыта.
Сонун түһүмэҕинэн ньургуһун туһунан ырыалары таайыы буолла. Күрэх «Угадай мелодию» биэрии быраабылатынан ыытылынна, манна «Чуораанчык» уһуйаан иитээччитэ Аммосова М.Е. пианиноҕа тыаһатан таайтарда. Тута хоһуйуу түһүмэҕэр хамаандалар хоһоон тутулун тутуһан, бэриллибит тиэмэни арыйан сааскы маҥнайгы сибэкки туһунан хомоҕой хоһооннору айан биһигини сөхтөрдүлэр. Тэрээһини олохтоохтор ньургуһун туһунан ырыалары толорон киэргэттилэр.
Кыайыылааҕынан Кындалбанова А. А. хамандыырдаах «Сылгы ньургуһуна» хамаанда кыайыылааҕынан таҕыста. Бары кыттааччылар өйдөбүнньүк бириистээх, тэрээһинтэн астынан, сүргэлэрэ көтөҕүллэн тарҕастылар.
