Олунньу 13 күнүгэр Төрөөбүт тыл уонна сурук-бичик күнэ бэлиэтэнэр. Саха Ѳрѳспүүбүлүкэтин бастакы Бэрэсидьиэнэ Михаил Ефимович Николаев «Төрөөбүт тыл уонна сурук-бичик күнүн биллэрэр туhунан» 1294 № Ыйааҕа 1996 сыллаахха олунньу 9 күнүгэр тахсыбыта. Бу күн чэрчитинэн нэһилиэкпитигэр «Төрөөбүт тылым — мин баайым» нэдиэлэ ыытылла турар. Бу күннэргэ «Сахалыы дьыктаан», «Таптыыр сахам тылынан» өрөспүүбүлүкэтээҕи аахсыйаларга олохтоохтор кыттыахтара. Оскуолаларга, уһуйааннарга араас тэрээһиннэр ыытыллыахтара.
Бүгүн, олунньу 12 күнүгэр, Курбуһахтааҕы кырдьаҕастар уонна инбэлииттэр дьиэлэригэр «Тыл хонуута» хамаанданан оонньуу бэрт сэргэхтик ыытылынна. Оонньуу кыттааччылара сахалыы өс хоһооннору, таабырыннары таайдылар, «Бу кимий?», «Тылла таһаар» сорудахтары аастылар. Түһүмэхтэр икки ардыларыгар 3 кылаас үөрэнээччилэрэ (кылаас салайааччыта Колмогорова М.М.) сахалыы ылбаҕай ырыалары ыллаатылар, хомоҕой хоһоон аахтылар, олоҥхоттон быһа тардыыны толордулар. Хамаандалар оонньууттан астынан, элбэҕи билэн-көрөн тарҕастылар.
