Быйыл Улуу Кыайыы 80 сылын бэлиэтиибит. Бу бэлиэ күнү көрсөргө Балаҕаннаах бөһүөлэгин олохтоохторо ааспыт сылтан саҕалаан бэлэмнэнэ сылдьаллар. Тохсунньу 31 күнүгэр үбүлүөйдээх сылга ыытыллыахтаах үлэлэри торумнуур мунньах ыытылынна. Бу күн мунньах кыттыылаахтара Улуу Кыайыы 80 сылынан ыытыллыахтаах тэрээһиннэр тула санаа атастастылар, этиилэри киллэрдилэр.
Үлэ-хамнас уопсай хаамыытын Саввинова Е.Г. сиһилии барытын ырытан кэпсээтэ, туох тутуулар анал проекка олоҕуран барыахтаахтарын иһитиннэрдэ. Ыһыахтыыр сиргэ барыахтаах тутуулар тустарынан кэпсээтэ — мас билиэтэ ылыллан, кэрдиллэн, хайыттарыллан, ураһа, концертыыр сцена, ыһыах сиэригэр-туомугар туттуллар сэргэлэр оҥоһууларын. Саппыйа алааска төрөөбүт оҕолор испииһэктэрэ чуолкайдана сылдьарын Егорова Т.И. онно үлэни ыыта сылдьарын, ФАП турбут сиригэр мемориальнай дуоска ыйанан, онно үлэлээн, олорон ааспыт дьон туһунан суруктаах буоларын иһитиннэрдэ, төрөөбүт оҕолорго бэлиэ оҥоһуллуохтааҕын эттэ. Культура үлэһитэ Оконешникова Е.Г. ыһыах күн бу бэлиэ миэстэ арыллыыта буоларын, культурнай, спортивнай тэрээһиннэр туһунан иһитиннэрдэ, ыһыах программата аттарыллан, сценарист Ермолаев А.П үлэлэһэ сылдьарын,»Кыайыы ыскамыайката», «Кыайыы 80 сылыгар — 80 олбох» акциялар ыытыллан саҕаламмыттарын сырдатта. Буойун саллааттар тустарынан нэһилиэк кинигэтэ тахсарынан ахтыылар, хаартыскалар, сэдэх докумуоннары булууга эбии чуолкайдааһын үлэтэ бара турарын туһунан Гуляев Д.М иһитиннэрдэ. Эрдэ Кыайыы 75 сылыгар хомуллубут харчы туһунан отчуоту Бурнашева Г.Ф онордо, 145 тыһ.солк хомуллубутуттан билигин 35 тыһ.солк баарын эттэ. Тутуу маһын булууга уустуктары көрсүү баарын эттилэр, маһы кэрдии сокуонугар олоҕуран анал дэлээнэ быстаран үлэни тэрийиигэ этии киирдэ, Балаҕан дьиэ тутуутугар нэһилиэк уонна улуус администрациялара кыттыгас үбүлээһин үлэтин ыытарын туһунан нэһилиэк баһылыга Петров В.Н кэпсээтэ. Бу курдук балаҕаннаахтар үгүс былааннаах Кыайыы 80 сылын көрөсргө бэлэмнэнэллэр.
