Төрөөбүт тыл көлүөнэттэн көлүөнэҕэ бэриллэр норуот улуу нэһилиэстибэтэ буолар. Оҕону кыра сааһыттан дьиэ кэргэҥҥэ, уһуйааҥҥа, оскуолаҕа төрөөбүт тылынан иитии-үөрэтии сүрүн сорукпут буолла. Кырачааннарга сахалыы эйгэни тэрийэр санааттан Курбуһах нэһилиэгэр Ил Дархан гранын кыайыылааҕынан тахсыбыт “Ийэ тыл эйгэтэ” бырайыак үлэтин саҕалаата.
Бырайыак чэрчитинэн Уус Күөлүн библиотеката “Чуораанчык” уһуйаан кырачааннарыгар араас тэрээһиннэри ыытар. Олортон биирдэстэрэ – көһө сылдьар библиотека : оҕолорго сахалыы дьэрэкээн кинигэлэри илдьэн көрдөрөбүт, кэпсиибит, уларсан хаалларабыт. Иитээччилэр бу кинигэлэри кырачааннарга нэдиэлэ устата ааҕаллар, кинигэ тула кэпсэтиилэри ыыталлар. Бу курдук нэдиэлэ аайы оҕолор саҥаттан саҥа сахалыы остуоруйалары, кэпсээннэри кытта билсэллэр, төрөөбүт тылларынан саҥаралларын сайыннараллар.
