Хас биирдии киһи бэйэтин төрдүн-ууһун, аймахтара уутуйан олорбут сирдэрин, оттуур-бултуур алаастарын чуо билэрэ, үѳрэтэрэ өбүгэтин иннигэр кини ытык иэһэ буолар. Дэлэҕэ да «Өтөх төҥүргэстээх, сурт кэриэстээх» диэн өс хоһооно уос номоҕо буолан күн бүгүҥҥэ диэри тыыннаах. Оҕолорбут кыра эрдэхтэриттэн кимтэн кииннээх, хантан хааннаах буолалларын билэ улааталларыгар уһуйаан саастарыттан толкуйдатан, кини төрдүн-ууһун билэргэ дьулуһар суолу тобуларыгар төрөппүттэр, иитээччилэр, учууталлар дьулуһабыт.
Кулун тутар ый устата Курбуһах орто оскуолатын кыра уонна орто сүһүөх кылаастарын үөрэнээччилэригэр “Төрүччү” дьиэ кэргэн күрэҕэ биллэриллибитэ. Төрүччү оҥоруу балаһыанньа быһыытынан көҥүл формалаах этэ. Онон араас сонун оноһуктар киирдилэр. Ким суруйан, ким хартыына курдук онорон, кырааскалаан, аныгы дьон быһыытынан араас компьютернай программаҕа киллэрэн онорбуттара, аймах эрэ баайа буолбакка, бүтүн нэһилиэккэ туттуллар матырыйаал буолуон сөп эбит дии санаатыбыт. Түмүккэ кыра бөлөххө 1 миэстэ Иван, Назар Егоровтар, 2 миэстэ Арсентий, Антон Захаровтар, 3 миэстэ Милена Афанасьева буоллулар. Орто бөлөххө: 1 м. – Валерия Варфоломеева, Айыына Дорофеева, 2 м. — Ярослав Гуляев, 3 м. — Лилиана Местникова. Кыайыылаахтарга Добун суруктар, нэһилиэк администарцията, оскуола уонна олохтоох библиотека олохтообут бэлэхтэрэ туттарылыннылар.
