Дата установления: 2015

Автор: Бурнашев Афанасий Васильевич

Место установления: Местность Куула эбэ 

Описание: Мемориальная доска из мраморной плиты прикреплена к железному листу в виде карася, которая установлена на железных трубах.

 Собо балыкка өйдөбүнньүк

     Аҕа дойду сэриитин сылларыгар Саха сиригэр уот кураан сатыылаабыта. Ону сэргэ «тимир тиистээх» аһыҥа үөн күүскэ туран, үс сайын субуруччу улахан кураан сатыылаабыта. От, бурдук олох үүммэтэҕэ. Арҕаа уоттаах сэрии бара турар буолан, соҕурууттан ас-үөл, бурдук кэлиитэ тохтообута. Онон хоргуйуу саҕаламмыта.

     Историктар суруйалларынан, сэрии сылларыгар Саха сирин улуустарыгар хоргуйууттан, куһаҕан астан, онно эбии күүстээх үлэттэн 60 тыһ. киһи суорума суолламмыт. Ол Курбуһаҕы да тумнубатаҕа, хоргуйан өлүү баара. Бу өссө улахан буолуоҕун сорох күөллэр куйаардатар буоланнар абыраабыттара. Ол курдук, Балаҕаннаахха Куула Эбэ диэн алаас күөлэ хас да кыһын куйаардатан абыраан элбэх киһини хоргуйан өлүүттэн быһаабыта. Куйуурдааһын тохсунньу ый эргэтиттэн саҕалаан баран, уһун сааһы быһа барара. Олохтоохтору таһынан, Бэрт-Ууһуттан, Бахсыттан уонна да атын сирдэртэн кэлэн куйуурдуллара. Манна биир түгэни бэлиэтиэхпин баҕарабын. Сэриигэ сылдьан винтовканан самолету суулларбыт, аҥар илиитин кыргыһыы толоонугар хаалларбыт Лэгэнтэй Аммосов-Лэбиһээх сүрдээх халыҥ мууһу алларара, дьоннору сөхтөрөрө.

      Быйыл күһүн элбэх киһини хоргуйан өлүүттэн быыһаабыт Эбэбитигэр махтанан туран, Кыайыы 70 сылынан өйдөбүнньүк бэлиэ туруодубут. Онно мрамор тааска сэрии тыйыс кэмин кэрэһэлиир сурук суруллан, халыҥ тимир лиистэн оҥоһуллубут собо балык фонун ортотугар сыһыарылынна. Атахтара эмиэ тимир суон турбалар. Онон үйэлээх оҥоһук буолла. Бу өйдөбүнньүк кэлэр көлүөнэлэргэ уодаһыннаах, алдьархайдаах сыллар тустарынан саната туруоҕа. Өйдөбүнньүгү туруорууга бөһүөлэктэн төһө да тэйиччитин иһин, отучча киһи кытынна. Ордук үөрэрим диэн Балаҕаннаах алын сүһүөх оскуолатын оҕолоро сылдьыбыттара буолар.

         Маны сэргэ, тэрээһиҥҥэ нэһилэккэ билигин баар соҕотох сэрии бэтэрээнэ Ф.В. Бурнашев, Курбуһах орто оскуолатын директора Н.М. Гуляев, нэһилиэк баһылыгын солбуйааччы А.А. Аммосов, нэһилиэк дьаһалтатын специалиһа Д.М. Гуляев, нэһилиэк кырдьаҕастарын сэбиэтин бэрэссэдээтэлэ М.М. Бурнашева, оскуола музейын үлэһитэ П.П. Окоемов, культура үлэһитэ нэһилиэк депутата Е.Г. Оконешникова, Дьокуускай куорат 38№ -дээх оскуолатын учуутала Г.Ф. Бурнашев, Балаҕаннаах оскуолатын учуутала Д.Д. Шелковников сырыттылар. Элбэх тыл этилиннэ, ырыа ылланна, ас араааһа тардыллынна. Уот оттон Эбэбитин арыылаах алаадьынан айах тутан күндүлээтибит.

                                                                                                                                                                                                                                                  Афанасий Бурнашев  "Мүрү саһарҕата", 28.10.2015.