Саха Республикатын культуратын туйгуна, В.Д.Лонгинов аатынан Тандатааҕы норуот айымньытын киинин директора, импровизатор хомусчут Альберт Находкин авторскай бырайыагынан

 11 төгүлүн ыытыллыбыт «Хомус Кырдала» хомусчуттар күрэхтэригэр барыта 160 кыттааччы уонна 13 бөлөх Чурапчыттан, Томпоттон, Амматтан, Орто Халыматтан, Сунтаартан, Тааттаттан, Намтан, Кэбээйиттэн, Мирнэйтэн, Хаҥаластан, Ньурбаттан, Бүлүүттэн, Мэҥэ Хаҥаластан, Үөһээ Дьааҥыттан, Абыйтан, Уус Алдантан, Дьокуускай куораттан, Башкортостан өрөспүүбүлүкэтиттэн кытыннылар. Быйылгы күрэх дьүүллүүр сүбэҕэАльбина Михайловна Дегтярева-Аан дойду виртуоз-хомусчута, Саха Өрөспүүбүлүкэтин үтүөлээх артыыһа, Эркин Павлович Алексеев-импровизатор хомусчут, Хомус Аан дойдутааҕы түмэлин учуонай сэкэрэтээрэ, Дмитрий Дмитриевич Бэстиинэп - Аан дойдутааҕы хомус түмэлин директора, Туяра Анатольевна Жиркова-импровизатор хомусчут, хомус Аан дойдутааҕы түмэлин быыстапкалыыр отделын сэбиэдийиссэйэ үлэлээтилэр. Бу күрэххэ Н. Н. Окоемов аатынан Курбуһах орто оскуолатын 11 кылааһын үөрэнээччитэ  Олеся Винокурова 1 степеннээх дипломант аатын сүктэ уонна В.Д.Лонгинов аатынан Тандатааҕы норуот айымньытын киинэ туруорбут  анал статуэткатынан наҕараадаланна. Хомуһу бөлөҕүнэн толорууга 1 миэстэни Курбуһах нэһилиэгиттэн «Сардаҥа» бөлөх (салайааччы Василий Тимофеевич Тимофеев) ылла уонна Петр Оҕотоойоп оскуолаҕа бииргэ үөрэммит доҕотторо туруорбут бириистэринэн наҕараадаланна. Бу улахан ситиһиилэринэн хомусчут оҕолорбутун эҕэрдэлиибит.