ГРИГОРЬЕВА ЕЛИЗАВЕТА МИХАЙЛОВНА

(1965-2020)

            1964 сыллаахха Уус Алдан орйуонугар Курбуһах нэһилиэгэр төрөөбүтэ. Орто анал үөрэхтээх. 3 уол оҕо ийэтэ, 2 сиэн эбэтэ. Өр кэмҥэ "Сардаҥа" инбэлииттэр түмсүүлэрин бэрэссэдээтэлинэн үлэлээбитэ. Нэһилиэк, улуус уопсастыбаннай олоҕор көхтөөхтүк кыттара. Олус үчүгэйдик баайара, иистэнэрэ. Елизавета Михайловна күннээҕи дьиэ-уот түбүгүттэн быыс булан хоһоон хомоҕой тылларынан санаатын кэпсиир үтүө дьарыктааҕа.  Айылҕа кэрэ көстүүлэрин, таптал, олох туһунан хоһоонноро чахчы ис сүрэхтэн тахсар иэйиилээх тылларынан суруллубуттар. “Куду” литературнай түмсүү көхтөөх чилиэнэ этэ. Хоһоонноро “Мүрү саһарҕата” хаһыакка бэчээттэммиттэрэ, араас литературнай конкурстарга кыттыбыта.

 

 

Күһүҥҥү айылҕа

Номнуо күһүммүт кэлэ оҕуста

Тымныы тыалынан үргүйэн,

Хаарыан күөх тыабытын хагдарытан,

Сэбирдэхтэри суйдаан.

 

“Аны сайыҥҥа диэри”, - диибин

Мин алааһым хатыныгар,

Сайын сир астыы элбэхтэ

Хаампыт ыллык суолбар.

 

Тулабар иһийэн турар айылҕам

Мин ис санаабын истэрэ,

Лабааларын суугунатан

Быраһаайдаһар курдуга.

 

Сибэкки сипсиэрэ

Түһээммин куруутун

Чыычаах буолан көтөбүн,

Күөх хонууга түһэммин

Сибэккилэрдиин сэһэргэһэбин.

 

Кинилэр миэхэ кэпсииллэр

Сири-дойдуну киэргэтэллэрин,

Күҥҥэ күлүктэрин көрүнэллэрин,

Түүҥҥү сииккэ сууналларын.

 

Халлаантан сулустар түһэн,

Саҥалыы эрчими эбэллэрин,

Тахсар күн уотун сылааһа

Кинилэргэ эрэ ананарын.

 

Кэрэтэ кэхтэн бүтүүтэ,

Симэлийэ сүтүүтэ

Саҥа сибэккилэр солбуһан

Олох салҕанан барарын.

 

Дьэдьэн

Сайын аайы сайылыгым

Саҕатыгар сөбүлээн үүнэр

Сахам сирин маанылаах

Сирин аһа – дьэдьэним.

 

Күн чаҕыл сардаҥалара

Кини сүмэһинигэр иҥмиттэр,

Кытыастар күнү санатар

Кып-кыһыл дьэдьэннэр.

 

Туохха да тэҥнэммэт

Кини минньигэс амтана,

Киһи дууһатыгар иҥэн киирэр

Дыргыл кэрэ сыта.

 

Минньигэс дьэдьэн барыанньата -

Сандалы остуол киэргэлэ,

Кыһыҥҥы хобдох киэһэҕэ

Күөх сайыны санатар.

 

Саҥа күн

Саҥа күннүүн аргыстаһан,

Сиккиэр тыаллыын сэргэстэһэн

Айылҕаҕа сылдьарбын

Туохтааҕар да ордоробун.

 

Үчүгэйиэн эрдэ туран

Чэбдик салгынынан тыынар,

Сииктээх оту кэһэн

Айылҕалыын алтыһар.

 

Саҥа күнү уруйдаан

Чыычаахтар ыллыыллар,

Тахсар күн уотуттан

Айылҕабыт уһуктар.

 

Саҥа күн, дорообо

Өссө да халлааҥҥа

Умулла иликтэр сулустар.

Айылҕабыт суугунуур,

Сибэккибит нуоҕайар.

 

Сарсыардааҥы сылаас күн

Сандаарыччы тыкта,

Сииктээх оту, сибэккини

Сырылаччы куурта.

 

Күммүт уота күүһү-уоҕу

Күлбүтүнэн уунна,

Дьиэбит иһигэр чэбдик салгын

Тобус-толору кутулунна.