ВАСИЛЬЕВ ГАВРИЛ ГАВРИЛЬЕВИЧ

      1949 сыллаахха Уус Алдан оройуонун Курбуһах нэһилиэгэр төрөөбүтэ. Курбуһах орто оскуолатын бүтэрэн баран производствоҕа 2 cыл үлэлээбитэ. Ленинград куоракка тутуу идэтин биэрэр ГПТУну кыһыл дипломунан,  Амурскайдааҕы тутуу техникумун ситиһиилээхтик үөрэнэн бүтэрбитэ. 1974 c. “Ленинградский университет рабочих корреспондентов” диэн киэһээҥҥи үөрэҕи бүтэрэн “Верхоянский коммунист” хаһыакка үлэлээбитэ. Дойдутугар Курбуһахха кэлэн өр кэмҥэ биригэдьииринэн, кырдьаҕастар интернат дьиэлэригэр директорынан үлэлээбитэ.

     “Гражданскай килбиэн”, “Саха Республикатын тутуутун бочуоттаах ветерана”, “Уус Алдан улууһун социальнай-экономическай сайдыытыгар кылаатын иһин” бэлиэлэр хаһаайыннара. 4 оҕолоох, 9 сиэннээх.

 

Геройга анаан

(Н. Д. Бурнашевка)

 

Үрэхпит быйыл да үүнүүтэ

Үгүөрү буолууһу быһыыта,

Үчүгэй оҕонньор ыһыыта

Күөх солко муоралыы долгуйда.

 

Хос ырыата:

Сиилэспит ситэри сиппитэ -

Барыбыт үөрүүтэ-көтүүтэ.

Эмис эт, өлгөм үүт үксүүрэ -

Курбуһах үлэтин көстүүтэ.

 

Уолаттар чулуулара түмсэннэр

Күрүө да бөҕөтүн туттулар,

Күөх маасса сылтан сыл дэлэйэр,

Элбииллэр саҥаттан дьаамалар.

 

Сопхуос, оройуон, өрөспүүбүлүкэ

Оҕонньор аатынан киэн туттар,

Курбуһах үлэҕэ майаага

Бырынаһыап Ньукулай дуо дэтэр.

 

Үгүс да көлөһүн тохтубут

Сыралаах үлэтин түмүгэр

Дьоруойбут Албан аат уордьанын

Түөһүгэр толору иилинэр.

 

 

Алгыстаах Курбуһах

Алданнаах Өлүөнэм арҕаһа,

Үүнүүлээх үөгүлүүр үрэҕэ,

Абылыыр арыылаах алааһа

Алгыстаах Курбуһах дойдута.

 

Хос ырыата:

Удьуор хаан үлэһит аймаҕын

Утумнуо кэнэҕэс ыччатыҥ,

Үйэттэн үйэҕэ салҕаннын

Курбуһах көлүөнэ дьонунан.

 

Хаптааннаах кулуба улууска

Олоҕу уһуннук салайар,

Убайбыт Ньукулай совхозка

Саргылаах аартыгын арыйар.

 

Дьоруойдар үйэлээх ааттара

Олоҥхо үөрэҕин албана,

Муоһунан дьиктини айааччы

Үүммүттэр төрүт уус дойдубар.

 

Үүнүүбүт, сайдыыбыт мэктиэтэ

Курбуһах барҕарар, чэчириир,

Тупсаҕай тутуунан киэркэйэ

Саҥаҕа, сонуҥҥа тардыһар.

 

Кылайар кыымнары күөдьүтүүм

(тапталбар)

Эйиэхэ олуһун хойутаан

Этэргэ сананным кистэлбин,

Олохпор сэрэнэн бүөбэйдээн

Сүрэхпэр сөҥөрбүт тапталбын.

 

Айыыбын мин тугу кистиэмий

Бэйэбин сэнэммит кэнэммин,

Дьэ кэлэн өйдөнөн кэмсинним,

Төһөлөөх эрэйи кэппиппин.

 

Иккиэн да сиппэтэх баҕабыт

Төрүөтэ эйиэхэ саспытын,

Дьылҕа хаан ыйааҕар балыйан

Биллибит олохпут охсуутун.

 

Бу тылы этэргэ холонуум

Мин үтүө саастарбын бараата,

Оҕонньор олоҕун толоруум

Ыас хара баттахпын маҥхатта.

 

Сүрэҕим баастарын хаҕылыам

Эн ааккын ааттыыртан туттунуум,

Баҕардар хоргутуон, хомойуон

Сатаатар хойутаан билиниим.

 

Кэлтэйдии суланар туойууттан

Ааспыты сөргүтүү көлдьүнүн,

Хайатын быһаарбат муҥуттан

Кылайар кыымнары күөдьүтүүм.

 

 Тапталга анаммыт курдуккун

(көссүүбэр)

Үрүҥ туллук ини мөлбөстүүр

Хоһоону хомуйар этиилэр

Эйиэхэ анаммыт эбиттэр

Ый ыраас сып-сырдык киһибэр.

 

Эн кэрэ таһааҕар ымсыыран

Эдэрбэр түспүттүү умустум,

Топ-толуу бэйэҕэр ылларан

Өйбүттэн тахсыбыт курдукпун.

 

Сып-сылаас мөтөгөр түөстэриҥ

Эдэр саас кэрэтин кэпсииллэр,

Ууллаҕас эйэҕэс мичээриҥ

Угуйан, ыҥыран эрэллэр.

 

Арыый да саастарбын баттаһан

Хамматах баҕабын ылаары,

Кыл түгэн кэриэтэ таптаһан

Сүрэхпэр уматтым кутааны.

 

Бу ырыам тыллара тардыһыҥ

Көй ыраас салгыҥҥа уйдара,

Эн бары имэҥнээх туттунууҥ

Анаммыт эбиттэр тапталга.

 

Эн илииҥ илиибэр баар курдук

(Л. Поповка)

Үгүс да умсулҕан ырыаны айаҥҥын

Норуоккар сүппэттии, өспөттүү ааттанныҥ,

Күн диэки мичийэ сэргэхтик туттаҥҥын

Туруоҕуҥ дуоһуйан илиигин уунаҥҥын.

 

Сүүс сыл диэн сүүнэ саас буоларын билэбит,

Биир үйэ аастаҕа биир хонук кэриэтэ,

Эн ааккар суон чыпчаал сыанабыл биэрэбит -

Ол буолуо махталбыт, тапталбыт бэлиэтэ.

 

Умайан ааһыаҕа хас биирбит олоҕор

Уйаҕас сүрэҕин суоллара хааланнар,

Тапталга анаммыт имэҥнээх хоһооннор

Дууһаҕа уостубат сүүрээни кутаннар.

 

Күндүттэн күндүгүн төрөөбүт дойдугун

Тылгынан ситэрэн дьүһүйбүт сыраҕын,

Хаһан да умнубат махталлаах бар дьонуҥ

Сүрэҕэр ылынар эн иэйииҥ сылааһын.

 

Эйигин хоһуйар судургу диэбэттэр,

Улахан киһигин - мөккүөр суох дэһэллэр,

Ыллыктаах хас этииҥ эгэлгэ дэгэттэр,

Ырыаҕар уран тыл сүмэтин күөттүүллэр.

 

Олоҕун кэрчигин хоһооҥҥор этэҕин,

Эн үөрүүҥ, эн көрүүҥ биир тэҥҥэ хаамсаллар.

Санньыйар санааҕын, инники эрэлгин

Сурукка тиспитиҥ кэннигэр хаалаллар.

 

Чугаскыт даҕаны бу тутан ылыахтыы

Алыптаах дорҕооннор күн көмүс ырыалыын,

Үйэлээх айымньыҥ төлкөтүн ыралыы

Санаабар эн илииҥ куруутун баарыныы.