Улуу Кыайыыны уһансыбыт дьоммутун билии, кинилэр ааттарын үйэтитии, сырдык мөссүөннэригэр сүгүрүйүү хас биирдиибит ытык иэһэ буолар.

Ыам ыйын 2-3 күннэригэр Курбуһах орто оскуолатыгар  "Кинилэр Кыайыыны уһансыбыттара" ахтыы күннэрэ буолан аастылар. Тэрээһиҥҥэ оскуолабыт үөрэнээччилэрэ эбэлэрин, эһэлэрин Ийэ дойду көмүскэлигэр дьоруойдуу быһыыларын, холкуоска сыралаах үлэлэрин  сырдатар ахтыылары оҥордулар, кинилэр дьиэ кэргэннэрин Кыайыыга кылааттарын кэпсээтилэр.

Хас биирдии оҕо кыһаллан бэлэмнэммитэ, көрдөрөр матырыйаалы оҥорон туһаммыта олус кэрэхсэбиллээх. Улахан кылаас үөрэнээччилэрэ ини-биилэр Аҕа дойду сэриитигэр кыттыыны ылбыттарын кэпсээтилэр, "Норуот өйдөбүнньүгэ" порталы, архыыптар докумуоннарын туһаммыттарын олус сэргээтибит.  Оҕолор бу дьоллоох олох төһөлөөх сиэртибэнэн кэлбитин өйдүүллэрэ уонна махтана саныыллара барыбытын долгутта.

   Өйдөбүнньүк күҥҥэ эдэр көлүөнэ Улуу Кыайыыны уһансыбыттар ааттарын үйэтитиэхтээхпит, кинилэр курдук дойдубутугар бэриниилээх, норуоппутугар туһалаах дьон буола улаатыахтаахпыт диэн этиилэринэн тэрээһин түмүктэннэ.