Биир дойдулаахпыт, Саха сирин бөдөҥ государственнай, политическай деятелэ Н.Н.Окоемов төрөөбүтэ 125 сылыгар аналлаах улуустааҕы айымньы күрэҕин кыайыылаахтарын хоһооннорун кытта билсэргитигэр ыҥырабыт.

ОҔОЛОРГО:

1 миэстэ

Үтүө аата умнуллубат

                                                   Окоемов Н.Н.  ананар

«Дулҕа көлүйэттэн» силис тарпыт

Билиигэ баҕалаах кыракый уолчааны,

Аймах-билэ дьонноро өйүөлээн-таҥастаан

Улууспут киинигэр үөрэтэ ыыталлар.

 

Томторунан, Дьокуускайынан үөрэҕи бүтэрэн

Дойдутун дьонугар махталын биллэрэн,

Үөрэхтээх суруксут үлэтин-хамнаһын

Аан-маҥнай Курбуһах сириттэн саҕалыыр.

 

Эмиэ да сэриилэһэн саа-саадах туппут

Улууһугар бастакынан комсомуолу тэрийбит.

Үлэһит киһини өтө көрөннөр

Москуоба куоракка үөрэтэ ыыталлар.

 

Салайар дьоҕурдаах эдэркээн киһи

Улуукан норуоттан элбэххэ үөрэнэр.

Сахатын сиригэр бэлэмнээх каадыр

Дьэ үлэ үөһүгэр үөрүүнэн түсүһэр.

 

Бүлүүнэн, Алданынан  сыарҕалаах атынан

Кыһынын тымныыга, сайынын итиигэ,

Көлүөһэ үрдүгэр, ардыгар сатыылаан

Сахатын сирин тилийэ хаампыта.

 

Кинини көрөллөр холкуоска, тэрилтэҕэ

Үлэтин быыһыгар «кыымҥа» да буолааччы

Куруутун дьоннордоох, эдэр да ыччаттаах

Хаһан да сылайбат эдэрдии эрчимнээх.

 

Төрөөбүт дойдута, билии кыһата

Киэҥ тутта ааттыыллар, сүдү киһи аатын

Партия саллаатын Ньукулай Окойуомабы

Киһи киһитин, норуот киһитин. 

           Неустроев Айхал, Мүрү 1 оскуолатын 7 кылааһын үөрэнээччитэ (салайааччы Аммосова М.А.)

2 миэстэ

Эҕэрдэ эйиэхэ!

Бастыҥтан бастыҥмыт

Бассабыык ааттааҕа,

Батталы бахтаппыт

Николай Окоемов!

 

Эҕэрдэ эйиэхэ,

Эрэллээх ыччаттан!

Эн аатыҥ ааттана туруоҕа,

Эн ырыаҥ ылланыа буоллаҕа!

          Протопопов Петя, Окоемовка ситэтэ сүрүн оскуолатын 8 кылааһые үөрэнээччитэ (салайааччы Рожина И.И.)

3 миэстэ

«Николай эһэбит» акростих

 

Олоҕун норуокка иҥэрбит,

Көхтөөх күндү киһибит

Окоемов Николай эһэбит

Окоёмовканы ааттаппыт киһибит.

 

Манна ыытыллан кэллилэр,

Окоемовка аналлаах дакылааттар,

Выставкалар, биэчэрдэр

125-с сылын бэлиэтээн.

             Колодезникова Саша, Окоемовка сүрүн оскуолатын 7 кылааһын үөрэнээччитэ (салайааччы Рожина И.И.)

УЛАХАН ДЬОҤҤО: 

1 миэстэ

Норуота умнубатаҕа, умнубат!

Оҕо хаһан төрүүрүн таайбат,
Олох кэрэ кэмнэрин талбат,
Орто дойду олоҕун араарбат,
Оруо мастыы буолуоҕун анаарбат.

Окойуомап олоҕо түбэспитэ,
Олус тыйыс, хабараан сылларга,
Олох тосту иэҕиллэр кэмигэр,
Икки былаас хапсыһар кирбиитигэр.

Олох саҥа сүүрээнин талбыта,
Олук үктээн инники барбыта,
Охсуһуу үөһүгэр сылдьыбыта,
Улуукан дьыалаҕа кыттыспыта.

Оннук тыйыс, кырыктаах сахтарга
Ордук тэптэн кыайыыга дьулуспута,
Окойуомап аата аатырбыта,
Обкуомҥа тиийэ үрдээбитэ.

Оччолорго дьон кэрэмэһин
Ордук хасыһан хаайаллара,
Ончу буруйа да суоҕун иһин
Уураахтаат хаайыыга ыыталлара.

Олох дьыбара хаарыйбыта,
Отуора төрдүттэн хамсаабыта,
Амырыын хаайыы аймаабыта,
Айыы сириттэн араарбыта.

Оҥорбут дьыалата хаалбатаҕа,
Олорбут олоҕо уостубатаҕа,
Аата ааттаммыта үйэлэргэ,
Улуу буолбута Сахаларга.

Оо, Дьылҕа Хаан ыйааҕа ыараханыан,
Олох будулҕана ынырыгыан,
Арай оҥорбут үтүөҥ сандаарыаҕа,
Албан аатыҥ дьоҥҥо арбаныаҕа.

              Иннокентий  Попов (Суотту)

  2 миэстэ

Дорообо Ньукулай, эн кэллиҥ...

 

“Дорообо Ньукулай, эн кэллиҥ

Быстыбат ырааҕы эргийэн”.

125 сылы нөҥүөлээн

Бар дьоҥҥор, төрөөбүт түөлбэҕэр.

 

Эн кэллиҥ, бартыбыал тутуурдаах

Үөс сиртэн олоҕу билсиһэ.

Өрүүтүн үчүгэй сонуннаах

Мунньахтыы, үлэни тэрийсэ.

 

Эн кэллиҥ, биһиэхэ үтүөнэн

Нэһилиэк олоҕун түстэһэн.

Суолбутун-ииспитин көннөрөн,

Итиинэн ыал аайы илгийэн.

 

Эн кэллиҥ, кэнчээри ыччаккын

Саҥа таас тутуунан үөрдэҥҥин.

Сиэннэргэр сырдыгы арыйан

Дьиэ аанын боруогун атыллаан.

 

Доруобай олохтуу эн кэллиҥ

Норуоккун сирдээччи буолаҥҥын.

Балыыһа дьиэбитин дьэндэттиҥ

Махталбыт бэлиэтин туһаныаҥ.

 

Убайбыт Ньукулай, эн кэлиэҥ

Курбуһах үрэҕин сыыйаҥҥын.

Эн кэлиэҥ курутун тиэтэйэн

Дойдугун ахтаҥҥын, санааҥҥын.

                             Г.Г.Васильев (Курбуһах)

  3 миэстэ 

 Урукку улуулар...

Сэттистиирэ ыйбыт ортолуута,
Сэмэй дьадаҥы ыалга,
Дулҕа көлүйэ алааһыгар,
Уол оҕо Куола, күн сирин көрбүтэ.
Оччугуйуттан олус  оруннаах,
Кыратыттан билиигэ кыһамньылаах,
Төрөппүттэрин таптыыра,
Аймах дьонун саныыра.
Орто дойдуга кэлбит оҥоһуутунан,
Олохтоох толкуйунан,
Олох-дьаһах хаамыыта,
Олус кинини долгутара.
Икки кылаас үөрэхтээх,
Инникилиир эрэ санаалаах,
Сэбиэскэй былаас байыаһа,
Бастыҥтан бастыҥа кини этэ.
Үүнэн-сайдан улаатан,
Үрдүк аартыктары көрөрө,
Тыа сиригэр тыа олоҕун,
Тупсарарга турунар.
Төлөннөөх комсомолец,
Сымыйаны, албыны түөрэрэ,
Хомсомуол кыайыытын,
Хорсуннук туруулаһара.
Улууспут бастыҥа,
Киһи киһитэ,
Чон этэрээтин байыаһа,
Норуот киһитэ.
Быччыылык нэһилиэк,
Бастакы суруксута,
Партиялаах чулуута,
Тыа сирин уола.
Бастыҥтан бастыҥнар,
Өрүү инники этилэр,
Хотойдуу көтөллөр,
Дойду иэнин көрөллөр.
Норуот үйэлээх санаатын,
Кыым хаһыакка тиһэрэ,
Дойду инники күөнүн,
Хорсуннук туруорсара.
Ол уоттаах сылларга,
Өстөөх балыыра баара,
Өйүн-санаатын ытыйан,
Кырдьыгын өрүү булара.
"Сиэрдээх олох кыайыаҕа,
Норуот дьоллоох олоххо тиийиэҕэ"-
Ыралыыр санаатын ыллыктара,
Күн бүгүн тыгаллар дуо, доҕоттор?

Хорсун буолуоҕун, санаабытын этэргэ,
Баар кырдьыгы норуокка ыйарга,
Урукку уураахтар улууларын,
Дьоһун дьоммут чулууларын!

           Бээрийэ кыыһа Хотойук Айгыына